Syrttan kelgen adamdarǵa kómek kórsetiledi, biraq jeńildikter berilmeıdi - Prezıdent
TÚRKІSTAN. QazAqparat - Qazirgideı kúrdeli jaǵdaıda biz eń aldymen adamgershilik, sabyrlyq, uıymshyldyq tanytýymyz kerek. Bul pikirdi Prezıdent Qasym-Jomart Toqaev Túrkistan halqymen kezdesýde aıtty, dep habarlaıdy QazAqparat.
«Bizde eshqandaı daǵdarys joq, dúrbeleń de joq. Úkimet óz jumysyn atqarýy kerek. Syrttan kelgen adamdarǵa kómek kórsetiledi, biraq jeńildikter berilmeıdi. Jumystyń bári zań boıynsha, kelisimder boıynsha júrgiziledi», - dedi Memleket basshysy.
Onyń aıtýynsha, sońǵy kúnderi kórshi elden, ıaǵnı Reseıden kóptegen adam kele bastady. Al olardyń k ópshiligi qazirgi ahýalǵa baılanysty amaldyń joqtyǵynan kelip jatyr.
«Olarǵa qamqorlyq kórsetip, qaýipsizdigine mán berýimiz qajet. Bul – saıası jáne gýmanıtarlyq másele. Osy máseleni men Úkimetke tapsyrdym», - dep atap ótti Prezıdent.
Ol Reseı tarapymen kelissóz júrgizip, bul túıtkildiń el múddesine saı sheshiletinine sendirdi.
«Taǵy da qaıtalap aıtamyn, osyndaı almaǵaıyp kezeńde bizge, eń aldymen, bereke-birlik qajet. Eldiń tynyshtyǵyn saqtaı bilsek, turaqty damı alamyz. Barlyq máseleni baıyppen talqylap, aqylmen sheshýimiz kerek. Men qasıetti Mekkege barǵan kezde Qaǵba tórinde jáne osy joly kıeli Túrkistanda ata-babalarymyzǵa quran baǵyshtap, handarymyzdyń rýhyna taǵzym etip, Alladan bir-aq tilek tiledim. Ol – elimizdiń amandyǵy jáne halqymyzdyń birligi», - dedi Prezıdent.
