Syrtqy jarnama salasyndaǵy qoldanystaǵy zańda qarama-qaıshylyq kóp - B.Qojaqov
ASTANA. QazAqparat - Syrtqy jarnama salasyndaǵy qoldanystaǵy zańda qarama-qaıshylyq kóp. Bul týraly búgin «Qazaqstandyq jarnama kompanııalary alıansy» qaýymdastyǵynyń dırektory Bolat Qojaqov málim etti.
«Buǵan Ultyq kásipkerler palatasy saıtynda ornalastyrylǵan kásipkerlerdiń ótinishteri naqty dálel bolady. Zańda kereǵarlyq kóp. Jarnamamen jumys isteıtinderdiń barlyǵy da eń aldymen jumystarynyń qoldanystaǵy zańnamaǵa táýeldi ekendigin jaqsy biledi. Alaıda, zań túsiniktemesinde qosarly túsinik óte kóp», - dedi ol syrtqy jarnama salasyndaǵy quqyqtyq retteýdiń problemalaryna arnalǵan dóńgelek ústel otyrysynda.
Onyń sózine qaraǵanda, bul salada sheneýnikterdiń shamadan tys qorqaqtaýynan ákimshilik kedergiler qalyptastyp otyr. Olar zańnamadaǵy keıbir normalardy buzýdan qorqady.
«Máselen, syrtqy jarnamadaǵy problemaly máselelerdiń biri - bul qazaq mátinderin kelisý. Qoldanystaǵy zańnamada aımaqtyq tilderdi damytý basqarmalary bul mátindi bekitýmen aınalysatyndyǵy jazylmaǵan. Máselen, Almatyda jarnama berýshiler ǵylym kandıdattary men doktory jumys isteıtin Til bilimi jáne ádebıet ınstıtýtynyń bilikti mamandaryna qyzmetine júginedi. Olar sapaly aýdarma jasaıdy. Biraq, óńirlerdegi Tilderdi damytý basqarmalarynyń mamandary atalǵan aýdarmany qabyldamaıtyn jaıt ta kezdesedi», - dedi B.Qojaqov.
