Syrtqy sektorda baǵa ósimin baıaýlatýǵa yqpal etetin faktorlar basym – UB
«Syrtqy sektorda baǵa ósimin baıaýlatýǵa yqpal etetin faktorlar basym. Álemde azyq-túlik baǵalarynyń odan ári tómendeýi, Qazaqstannyń saýda-seriktes elderindegi tómen ınflıatsııa jáne damyǵan elderdegi ortalyq bankterdiń mólsherlemelerdi odan ary arttyrýǵa qatysty daıyndyǵy baıqalyp jatyr. Bıyl mamyr aıynda azyq-túliktiń álemdik baǵasy 2,6 paıyzǵa tómendedi. Ósimdik maılarynyń, dándi daqyldar men sút ónimderiniń quny tómendep keledi. Aldaǵy maýsymda egin jınaý boıynsha neǵurlym qolaıly jaǵdaılar aıasynda astyq baǵasynyń naqty serpini biz kútkennen de tómen boldy. Tıisinshe, azyq-túliktiń ishki baǵasy ósý turǵysynan odan ári baıaýlaıtyndaı múmkindigi bar», – dedi Ulttyq bank tóraǵasy.
Onyń aıtýynsha, Reseı men Qytaıda tutynýshylyq ınflıatsııa tómen mánde qalyptasyp otyr. Reseı banki mamyr aıynda ınflıatsııanyń ósý kezeńi bastalǵanyna jáne negizgi mólsherlemeni kóterý múmkin ekenine qatysty belgi berdi.
«Eýroodaqta júrgizilgen aqsha-kredıt saıasatynyń nátıjesinde baǵanyń ósýi birtindep baıaýlap keledi. Al ınflıatsııa turaqty kúıinde qalyp otyr. Bul Eýropa Ortalyq banki tarapynan barynsha qatań rıtorıkaǵa alyp keledi. Mundaı jaǵdaı AQSh-ta da baıqalyp otyr. Onda Federaldyq rezervtik júıe mólsherleme odan ári artýy múmkin ekenin málimdedi. Osylaısha, belgilengen nysanaly baǵdarlarǵa qol jetkizýdiń uzaq merzimine baılanysty kútýler aıasynda syrtqy monetarlyq talaptar úzdiksiz kúsheıip keledi», - dedi Ǵalymjan Pirmatov.
