Syrtqy saýda-sattyq konıýnktýrasy bizdiń qarjylyq sektorymyzdyń kemshilikterin jasyryp otyr - Borıs Ýmanov

«Eýrazııa saqtandyrý kompanııasy» AQ-nyń Basqarma tóraǵasy Borıs Ýmanov búgin Almatyda ótip jatqan táýekel menedjmenti jónindegi 8-halyqaralyq konferentsııada osylaı aıtty.

«Jaıly syrtqy saýda-sattyq konıýnktýrasy ázirge bizdiń qarjylyq sektorymyzdyń kóptegen kemshiligin jasyryp otyr.  Onyń biri, tipti jumys istemeı otyr deýge bolatyn Qazaqstan qor bırjasy. Bıyl Qazaqstanda «Halyqtyq ІRO» atty baǵdarlama iske qosylady. Onyń aıasynda qarapaıym azamattarǵa memlekettik kompanııalardyń aktsııalaryna aqsha salý usynylady. Bıýdjetten kóptegen mıllıon teńge halyqtyń qarjylyq saýatyn kóterý baǵdarlamalaryna, áleýetti ınvestorlardy aldaǵy ózgerister týraly habarlandyrýǵa jumsalady», - deıdi Borıs Ýmanov. Onyń paıymdaýynsha,  gıpotezalyq turǵydan «Halyqtyq ІRO» bolashaq kásibı emes ınvestorlardyń aktsııalar naryǵyndaǵy alaıaqtyqtyń taıǵaq jolyna túsýge májbúr bolýyna aparyp soqtyrýy múmkin. Onda sózsiz utylyp, ıdeıanyń ózinen kóńili qalatyn bolady. Buǵan jol bermeý úshin baǵdarlamanyń qatysýshylary toqsan saıynǵy dıvıdendterdi tólep úırenýi tıis.  Jekelegen ınvestorlar mundaı kompanııalardy ózderi tańdap, onymen kóptegen jyldar boıy qalady. Osyǵan oraı aktsııa qunynyń qubylmalylyǵy  jaǵdaıynda halyqtyń Úkimet jumysyna kóńiliniń tolmaýyn baıqatý táýekelderi tómendeıdi. «Álemdik qor alańdarynda aktsııalary saýdalanatyn jarııa kompanııaǵa qarajat salý kezinde bizdi árdaıym toqsandyq dıvıdendterdi tóleý tájirıbesi qyzyqtyrady. Bizdiń qorjynda qatarynan 36 toqsan dıvıdend tólengen aktsııalar bar. Osy jyldar ishinde bul kompanııa aktsııalarynyń quny órleýdi de, quldyraýdy da bastan keshirgenimen árbir 3 aı saıyn biz óz dıvıdendterimizdi durys alyp turdyq. Qandaı qazaqstandyq kompanııa aktsıonerlerine degen osyndaı qamqorlyqty maqtan tuta alady», - deıdi «Eýrazııa» saqtandyrý kompanııasynyń Basqarma tóraǵasy B. Ýmanov.