Syrtqy naryqta qazaqstandyq munaıǵa degen suranys azaıdy

ASTANA. QazAqparat - 2017 jyldyń qańtar-naýryzynda Qazaqstan ótken jylǵy sáıkes kezeńmen salystyrǵanda 2 paıyzǵa kem munaı eksportqa shyǵardy, dep habarlaıdy finprom.kz.

Energııa resýrstarynyń álemdik naryqtaǵy baǵasynyń birshama qalpyna kelýi Qazaqstannyń munaıdy shetelde satýdan túsetin kirisin birshama arttyrdy. Aǵymdaǵy jyldyń birinshi toqsanynda shıki munaı men shıki munaı ónimderin eksportqa shyǵarýdan 6 mlrd. dollar túsim alyndy. Bul 2016 jyldyń qańtar-naýryzynda kómirsýtekti eksporttaýdan túsken jalpy somadan 35 paıyzǵa artyq.

Bıyl Brent markaly munaıdyń 1 barreliniń quny alǵashqy úsh aı boıy 50-80 dollardan 56,81 dollarǵa deıin aýytqyp otyrdy. Al 2016 jyldyń basynda munaı baǵasy sońǵy 5 jyldaǵy eń tómengi deńgeıge túsip, barreline 28,94 dollardy quraǵan edi. Biraq sheteldik satyp alýshylarǵa qazaqstandyq munaıdy jetkizý kólemi qysqara túsýde. Aǵymdaǵy jyldyń 1 toqsanynda Qazaqstan 15,9 mln. tonna shıki munaı eksporttady. Bul 2016 jylǵy kórsetkishten 2 paıyzǵa kem.

2017 jyly Qazaqstan munaıyn eń kóp satyp alýshylardyń qatarynda Italııa memleketi bar. Munaıdan túsetin kiristiń shamamen 34,8 paıyzyn dál osy el qamtamasyz etip otyr. Bir jyldyń ishinde ıtalıandyq kásiporyndar Qazaqstannan satyp alǵan shıkizat kólemi 545 mln. dollarǵa baǵalanýda. Frantsııaǵa da munaı eksporttaýdan túsetin túsim de artyp 497 mln. dollardy qurady. Al Nıderlandyǵa 203 mln. dollarǵa munaı satyldy.

Biraq, qazaqstandyq munaıdy Japonııaǵa eksporttaýdan túsetin túsim bıylǵy jyldyń úsh aıynda 2016 jyldyń qańtar-naýryzymen salystyrǵanda 102,5 mln., Qytaıǵa 91 mln., Ispanııaǵa 79,5 mln. dollarǵa kemidi.