Syrtqy qaptamasy opyrylǵan: Óskemen turǵyndary jańa úıdiń sapasyzdyǵyna shaǵymdandy
ÓSKEMEN. QazAqparat – Óskemen qalasynyń turǵyndary ShQO ákimi Danıal Ahmetovke jańa salynǵan kópqabatty úıdiń sapasyzdyǵyna shaǵymdandy, dep habarlaıdy QazAqparat tilshisi.
Aımaq basshysy Danıal Ahmetovtiń aıtýynsha, Baýyrjan Momyshuly kóshesindegi 14-shi úıdi «Báıterek Development» ıpotekalyq kompanııasynyń tapsyrysymen «Garant QURYLYS» uıymy salǵan. Al qazirgi ýaqytta bul kompanııa bankrot boldy.
«Qurylys jumystarynyń sapasyzdyǵy saldarynan turǵyndar zardap shegýde. Arnaıy komıssııa qazirdiń ózinde smetany qaıta eseptep, sheshim shyǵardy. Barlyq kemshilikterdi joıý úshin 280 mln teńge qajet. Eger jyl sońyna deıin kompanııa ókilderi máseleni sheshpese, onda men kompanııany sotqa berýdi tapsyrdym. Óıtkeni másele zań aıasynda sheshilýi kerek. Óz tarapymyzdan kópqabatty úı turǵyndaryna kemshilikterdi joıýǵa bıýdjetten qajetti somany bólip, qoldaý kórsetemiz», - dedi ol.
Turǵyndardyń basym bóligi páterdi nesıege alǵan. ShQO ákimi eki-úsh kún ishinde ıpotekalyq kompanııanyń sheshimin kútetindigin jetkizdi.
«Sodan soń ary qaraı qaı baǵytta jumys isteý kerektigin sheshemiz. Olar shartqa qol qoıyp, jóndeý jáne qalpyna keltirý jumystaryna kepildik berýi tıis», - dedi Danıal Ahmetov.
