Syrtqy ister mınıstrliginiń eń sulý dıplomat-arýy anyqtaldy
ASTANA. QazAqparat - QR Syrtqy ister mınıstrliginde «Arý dıplomat» sulýlyq baıqaýy ótti, dep habarlaıdy QazAqparat tilshisi.
Atalǵan baıqaý 1 naýryz - Alǵys aıtý kúnine arnalǵan qaıyrymdylyq keshiniń bir bóligi edi. Oǵan mınıstrliktiń túrli departamentterinen kórikti de ónerli 15 qyzmetker qatysty. Baıqaý nátıjesinde olardyń barlyǵy estelik syılyqtarmen marapattaldy.
Qaıyrymdylyq keshinde sondaı-aq aýktsıon uıymdastyryldy. Máselen, qazaqstandyq sýretshi Seısenhan Mahambetovtyń sýreti 50 myń teńgege, qoldan jasalǵan tıbettik qanjar 25 myń teńgege, Hıları Klınton kitaby 9 myń teńgege satyldy. Buıymdardy satýdan barlyǵy 100 myń teńgeden astam qarajat jınaldy.
Odan bólek, SІM ǵımaratynda departamentter qaıyrymdylyq jármeńkesin uıymdastyrdy. Onda taǵamdar men sýsyndar, álemniń túrli elinen kelgen bazarlyqtar satylymǵa qoıyldy.
Jınalǵan qarajattyń barlyǵy Daýn sındromy bar balalarǵa kómek kórsetý maqsatynda qurylǵan «Solnechnyı mır» ońaltý ortalyǵyna aýdarylatyn bolady. QR SІM «Solnechnyı mır» qoǵamdyq qoryna birneshe jyldan beri kómek kórsetip keledi.
«Jyl saıyn 120-dan astam balamen jumys isteımiz. Úsh aı saıyn 30 bala tegin jattyǵady. Buǵan deıin bizdi «Asyl bala» respýblıkalyq qaýymdastyǵy qarjylandyratyn. Biraq, biz pılottyq joba bolǵandyqtan, kelisimshart merzimi aıaqtaldy jáne qazir qosymsha qarjy kózin izdestirip jatyrmyz», - dedi qoǵamdyq qor prezıdenti Evgenııa Chebotarevskaıa.
E. Chebotarevskaıa balalardyń jattyǵýǵa kún saıyn keletinin atap ótti. Olar logoped, defektolog, eńbek terapevti, oıyn terapevti, montessorı-pedagogpen jumys iteıdi. Sýret salý, mýzyka terapııasy, emdik dene tárbıesimen aınalysady jáne massaj kýrsynan ótedi.
Onyń aıtýynsha, Astanada Daýn sındromyna shaldyqqan 350-den astam bala bar.
