Syrtqy ister mınıstrliginiń aldaǵy mindeti qandaı
ASTANA. QazAqparat - Búgin QR Syrtqy ister mınıstrliginiń alqa májilisinde vedomstvo basshysy Qaırat Ábdirahmanov dıplomattardyń aldynda turǵan mindetterdi aıqyndap berdi, dep habarlaıdy QazAqparat.
«Memleket basshysynyń alǵa qoıǵan mindetterin eskere otyryp, Syrtqy ister mınıstrligi jáne barlyq shetelderdegi mekemeler kelesi baǵyttar boıynsha jumysty jalǵastyrýlary qajet. Birinshiden, Memleket basshysynyń 2018 jylǵy 10 qańtardaǵy «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Qazaqstan halqyna Joldaýyn iske asryý jónindegi jalpyulttyq is-sharalar josparyn iske asyrý boıynsha QR SІM-niń is-sharalar josparyn turaqty baqylaýǵa alý. Ekinshiden, ınvestıtsııalar tartýǵa nemese óz ónimin eksporttaýǵa múddeli otandyq kompanııalarǵa tikeleı járdem kórsetý boıynsha jumystardy jalǵastyrý», - dep atap ótti mınıstr.
Onyń aıtýynsha, barlyq Syrtqy ister mınıstrliginiń qujattaryn Qazaqstannyń 2025 jylǵa deıingi strategııalyq damý josparyna sáıkestendirý qajet. Tórtinshiden, ıntellektýaldy kólik júıesin qurý, onlaın-rejimde júkterdiń qozǵalysyn jáne olardyń kedergisiz tranzıtin baqylaý maqsatynda tsıfrlyq tehnologııalardy aýqymdy túrde engizý jumystaryn júrgizý kerek. Besinshiden, otandyq aýyl sharýashylyǵy jáne agrarlyq-ónerkásiptik keshenniń óńdelgen ónimderiniń eksportyn ilgeriletý boıynsha múddeli memlekettik organdarǵa, uıymdar men kompanııalarǵa járdem kórsetý boıynsha jumystar jalǵastyrylýy tıis.
«Altynshydan, «Astana» halyqaralyq qarjy ortalyǵyna 2018 jylǵy 4 shildedegi Astana qalasynda ortalyqtyń resmı ashylýyna jáne 14-shi DIEF-ti ótkizýine járdem kórsetý jumystaryn jalǵastyrý kerek. Jetinshiden, qolaıly jaǵdaı jasaý maqsatynda sheteldik azamattar úshin vızalyq rejimdi yryqtandyrý jáne elimizdiń ınvestıtsııalyq belsendiligin ári týrıstik áleýetin júzege asyrýǵa baǵyttalǵan qolaıly vızalyq saıasatty qalyptastyrý úshin quqyqtyq negizdi keńeıtý jumystaryn jalǵastyrý qajet. Segizinshiden, Qazaqstannyń qalalarynda «Smart City» tehnologııasyn damytý jáne qoldaný boıynsha ozyq halyqaralyq tájirıbeni zerdeleý jumystaryn jalǵastyrǵan abzal», - dedi Qaırat Ábdirahmanov.
