Syrtqy ister mınıstrliginde «Adaldyq alańy» jobalyq keńsesi ashyldy
Jobalyq keńse jumysynyń bastaýyna uıytqy bolatyn qujatty búgin QR Memlekettik qyzmet ister jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov pen Syrtqy ister mınıstrliginiń jaýapty hatshysy Nurlan Seıtimov rásimdedi.
«Búgin biz Syrtqy ister mınıstrligi basshylyǵynyń bastamasymen «Adaldyq alańy» jobalyq keńsesin ashyp otyrmyz. Ózderińiz biletindeı, byltyr 5 qazanda Elbasy óziniń halyqqa Joldaýynda elimizdiń barlyq óńirinde «Sybaılas jemqorlyqtan ada óńirler» jobalyq keńselerdi ashý jóninde tapsyrma bergen bolatyn. Sondyqtan bıyldan bastap ár oblysta, respýblıkalyq mańyzy bar qalalarda osyndaı óńirinde «Sybaılas jemqorlyqtan ada óńirler» jobalyq keńseleri jumys isteı bastady. Bul joba jumysynyń eń basty maqsaty - turmystyq sybaılas jemqorlyqty túbegeıli joıý», - dedi agenttik tóraǵasynyń orynbasary qujatqa qol qoıý barysynda.
Sonymen qatar Oljas Bektenov mundaı jobalyq keńseler elimizdiń barlyq memlekettik organdarynda ashylatyndyǵyn aıtty.
«QR Syrtqy ister mınıstrligi jemqorlyqqa qarsy baǵyttalǵan memlekettik jobaǵa qosylady. Bul rette jobalyq keńse mınıstrliktiń quzyretine kiretin konsýldyq qyzmet, memlekettik satyp alýlar jáne ınvestıtsııany qorǵaý syndy úsh baǵytta júrgiziledi», - dedi óz kezeginde Nurlan Seıtimov.