Syrtqy ister mınıstrligi Taılandta Qazaqstan azamatynyń qaza bolǵanyn rastady

«Iıa, qazannyń 1-ine qaraǵan túni Pattaııa jaǵajaıynda Qazaqstan azamatynyń óli denesi tabyldy», - dedi Syrtqy ister mınıstrliginiń resmı ókili Asqar Ábdrahmanov QazAqparat tilshisine bergen suhbatynda. Ol 42 jastaǵy Ermek Áljanov degen azamat bolyp shyqqan. Qazir Qazaqstannyń Taılandtaǵy konsýldyǵy osy máselemen aınalysýda, dep habarlady vedomstvodan.

Jergilikti buqaralyq aqparat quraldarynyń habarlaýynsha, shamamen túngi saǵat 3.30-da polıtsııaǵa jaǵajaıda sheteldik azamattyń denesi tabylǵany týraly habar túsken.

«Oqıǵa ornyna kelgen polıtseıler jaǵaǵa shyǵarylǵan sheteldik azamattyń denesin kórgen. Onyń ústinde tek qysqa shalbar men jeńil aıaq kıimi ǵana bolǵan. Sarapshylar, onyń 3-5 saǵat buryn qaıtys bolǵany týraly túıin jasady», dep jazady Pattaya Daily News.

Jáne marqumnyń qaltasynan osy mańda ornalasqan «Bı-Bıch» qonaqúıiniń kartochkasy tabylǵan. Júrgizilgen aldyn-ala tekserýdiń barysynda, álgi azamattyń zákirde turǵan qaıyqtyń symyna oralyp qalý yqtımaldyǵy týraly paıymdaý jasalyp otyr.

«Dı-Bıch» qonaqúıiniń qyzmetkerleri, onyń Qazaqstan azamaty Ermek Áljanov ekenin jáne olarda qyrkúıektiń 10-ynan beri turyp jatqanyn qýattady. Bastapqyda qyrkúıektiń 28-ine qaıtatyn bolǵan ol, keıinnen taǵy birazǵa qalatyn bolyp sheshken. Qyzmetkerler onyń beısenbi kúni keshki saǵat 19.00-da shomylýǵa ketip bara jatqanyn kórgen.

Polıtsııa, E.Áljanovtyń ólimine teńizdegi qatty tolqý sebep bolýy múmkin ekenin aıtýda, sodan keıin baryp óli dene jaǵalaýda zákirde turǵan qaıyqtyń symtemirine baryp oralyp qalýy múmkin.

«Qazaqstan elshiligi Áljanov myrzanyń qazasy týraly habardar etildi. Sot-medıtsınalyq saraptamanyń qorytyndysy alynǵannan keıin tekserý amaldary jalǵastyrylady», dep jazady taılandtyq basylym.