Syrtqy ister mınıstrligi Parıjdegi otandastarymyzdy abaı bolýǵa shaqyrdy
ASTANA. QazAqparat - Parıjdegi narazylyq aktsııasyna oraı Qazaqstan syrtqy ister mınıstrligi atalmysh qaladaǵy qazaqstandyqtarǵa úndeý joldady. Bul týraly vedomstvonyń Telegram-paraqshasynda jazyldy.
«Parıjdegi narazylyq tolqýynan týyndaǵan tártipsizdikterge baılanysty Qazaqstan elshiligi Frantsııadaǵy otandastarymyzǵa úndeý joldady. Onda elshilik halyqty barynsha abaı bolyp, jaýapkershilikti umytpaýǵa shaqyrady. Sondaı-aq, adam kóp jınalǵan jerlerden aýlaq júrip, asa qatty muqtajdyq bolmasa, múmkindiginshe qaýipsiz jerden shyqpaı, quqyq qorǵaý organdarynyń talaptaryn saqtaý jóninde keńes beredi. Búginde +33145615200 telefony boıynsha jedel jeli iske qosylǵan» delingen habarlamada.
Elshiliktiń málimetinshe, qazirgi tańda zardap shekkender arasynda qazaqstandyq azamattar joq.
Aıta ketý kerek, Parıjde 5,5 myńnan astam adam avtokólik otyny baǵasynyń kóterilýine baılanysty narazylyq aktsııasyna shyǵyp, onyń sońy beıbereket tártipsizdikterge ulasqan-dy. Búgingi tańda 107 adam qamaýǵa alyndy.
