Syrtqy ister mınıstrligi Mekkege qaraı zymyran jibergen kóterilisshi-hýsılerdi aıyptady
«Saýd tarapynyń resmı aqparatyna sáıkes, 2016 jylǵy 27 qazanda Iemendegi kóterilisshi-hýsıler Mekkege qaraı zymyran jiberdi. Qazaqstan Respýblıkasynyń Syrtqy ister mınıstrligi kóterilisshilerdiń bul áreketin aıyptaıdy. Mekke jáne Medıne jyl saıyn mıllıondaǵan qajy, onyń ishinde myńdaǵan qazaqstandyqtar qulshylyq jasaý úshin zııarat etetin qasıetti meken bolyp tabylady. Bul kózqaras boıynsha mundaı áreket órkenıettik, jalpy adamzattyq jáne izgilik turǵysynan alǵanda múldem qolaısyz bolyp tabylady», - delingen SІM málimdemesinde.
Sondaı-aq, Qazaqstannyń syrtqy saıasat vedomstvosy mundaı jaýapsyz quıtyrqy áreketter Iemendegi daǵdarysty sheshýge septigin tıgizbeıtinin, qaqtyǵysty saıası retteý keleshegin alystata túsetinin alǵa tartady.
«Qazaqstan Iemendegi áskerı áreketterdiń ári qaraı órshýiniń qolaısyzdyǵy týraly óziniń qaǵıdatty ustanymyna berik ekendigin rastaıdy jáne osy daǵdarysty retteýdiń jalǵyz durys joly saıası sheshim bolatyndyǵyn jaqtaıdy. Osyǵan baılanysty BUU Arnaıy ókili Ismaıl Ýld ash-Sheıh pen óńir elderiniń Prezıdent Abd Rabbo Mansýr Hadıdiń ákimshiligi jáne hýsı qozǵalysynyń ókilderi arasyndaǵy tikeleı kelissózderdi jandandyrý boıynsha kúsh-jigerlerine qoldaý bildiremiz», - delingen málimdemede.
