Syrtqy ister mınıstrligi Qazaqstan men Ózbekstan prezıdentteriniń kezdesýine qatysty túsinik berdi

ASTANA. QazAqparat – QR Syrtqy ister mınıstrliginiń resmı ókili Aıbek Smadııarov Qazaqstan Prezıdenti Qasym-Jomart Toqaev pen Ózbekstan Prezıdenti Shavkat Mırzıeevtiń beıresmı kezdesýine qatysty pikir bildirdi, dep habarlaıdy QazAqparat tilshisi.

«Eki el arasynda ózara saýda jaqsy damyp keledi. Sonymen qatar, tranzıttik áleýet pen mádenı baılanystarymyz joǵary deńgeıde. Sondyqtan atalǵan kezdesýdiń Qazaqstannyń basqa qalalarynda emes, naqty Shymkentte ótýi kóńilge qonymdy», - dedi A. Smadııarov vedomstvoda ótken aptalyq brıfıngide.

Osy oraıda memleket basshylary kezdesip, eki elge qatysty taqyryptardy emin-erkin talqylaýy óte mańyzdy ekenin aıtty.

«Ortalyq Azııadaǵy elderdiń basshylary kez kelgen ýaqytta kezdesip, baýyrlas halyqtar retinde keıbir máselelerdi emin-erkin taqylaýy qýantarlyq jaǵdaı», - dedi resmı ókil.

Budan buryn habarlanǵandaı, Memleket basshysy Qasym-Jomart Toqaev Shymkent qalasynda Ózbekstan Prezıdenti Shavkat Mırzıeevpen beıresmı kezdesý ótkizdi.