Syrtqy ister mınıstrligi Qazaqstan men EO arasyndaǵy yntymaqtastyqty tutas qamtıtyn baǵdarlama ázirleıdi - E. Ydyrysov
ASTANA. QazAqparat - Syrtqy ister mınıstrligi Qazaqstannyń EO-men yntymaqtastyqty tutas qamtıtyn baǵdarlama ázirleıdi. Baǵdarlama naqty jobalardy qamtyp, Elbasy belgilegen naqty mindetterdi sheshetin bolady. Búgin QR Parlamenti Senatynyń jalpy otyrysynda QR Syrtqy ister mınıstri Erlan Ydyrysov osylaı málim etti.
Eske salaıyq, jalpy otyrysta «Bir jaǵynan Qazaqstan Respýblıkasy men ekinshi jaǵynan Eýropalyq Odaqtyń jáne oǵan múshe memleketteriniń arasyndaǵy keńeıtilgen áriptestik pen yntymaqtastyq týraly kelisimdi ratıfıkatsııalaý týraly» QR Zańy qabyldanǵan bolatyn.
«Biz ekonomıkany jańǵyrtý jáne ártaraptandyrý jasap, jasyl ekonomıkaǵa kóshý, memlekettik basqarý júıesin jetildirý isinde Eýropalyq Odaqtyń kómegi men tájirıbesin meılinshe keń paıdalanatyn bolamyz. EO óz tarapynan Qazaqstanmen jasalǵan jańa kelisimge úlken mán beretinin, Qazaqstan osyndaı kelisimge qol qoıǵan Ortalyq Azııadaǵy alǵashqy el ekenin atap kórsetedi. Olardyń pikirinshe, jańa kelisim Qazaqstan men EO arasyndaǵy ekonomıkalyq jáne saıası baılanystardy tereń damytýǵa edáýir qarqyn berip, óńirimizdegi basqa elderge jarqyn úlgige aınalady », - dedi Syrtqy ister mınıstri Erlan Ydyrysov.
Onyń aıtýynsha, tutastaı alǵanda Qazaqstan men EO arasyndaǵy «ekinshi býyn» kelisimi yntymaqtastyqtyń aýqymyn aıtarlyqtaı ulǵaıtady.
«Qazaqstan EO arasyndaǵy is-qımyldyń jańa kezeńge shyǵatynyn eskere otyryp, biz «EO-EAEO» jelisi boıynsha yntymaqtastyq ornatý ıdeıasyn ilgerilete alamyz. Keńeıtilgen áriptestik pen yntymaqtastyq týraly kelisimdi ratıfıkatsııalaý Qazaqstannyń EO qarym qatynasyn damytýdyń jańa kezeńine aınalady, bul qatynastardyń sapaly jańa deńgeıge kóshkenin rastaıdy. Qujat qabyldanǵannan keıin Syrtqy ister mınıstrligi múddeli memlekettik organdarmen birlesip, qol jetkizilgen kelisimder men ýaǵdalastyqtardy iske asyrý boıynsha Eýropalyq Odaqpen yntymaqtastyqty tutastaı qamtıtyn baǵdarlama jasaýǵa kirisetin bolady», - dedi SІM.
