Syrtqy ister mınıstrligi Dıplomatııalyq qyzmet kúnin atap ótti
ASTANA. QazAqparat - 2 shilde kúni Syrtqy ister mınıstrliginde Qazaqstan Respýblıkasynyń Dıplomatııalyq qyzmet kúnine oraı saltanatty jıyn ótti, dep habarlaıdy QazAqparat.
SІM-nen málim etkendeı, sharaǵa Prezıdent Ákimshiligi, Parlament, mınıstrlikter men vedomstvolar ókilderi jáne dıplomatııalyq qyzmet ardagerleri qatysty.
Syrtqy saıasat vedomstvosynyń basshysy Qaırat Ábdirahmanov mınıstrliktiń barlyq qyzmetkerlerin kásibı merekelerimen quttyqtady. Sondaı-aq egemendik pen táýelsizdik alǵan kúnnen bastap Qazaqstan zamanaýı otandyq dıplomatııanyń bastaýynda turǵan Memleket basshysy - Elbasy Nursultan Nazarbaev bas «sáýletshisi» bolyp tabylatyn dáıekti jáne tıimdi syrtqy saıasatty júrgizip keletinin atap ótti.
«Biz ózimizdiń ulttyq táýelsizdigimizdi, egemendigimizdi, aýmaqtyq tutastyǵymyzdy qorǵap, qaýipsizdiktiń turaqty kepildikterin qamtamasyz etip «tatý kórshilik aımaǵyn» qalyptastyrdyq. Osynyń bári Elbasy - Qazaqstannyń Tuńǵysh Prezıdenti N.Á. Nazarbaevtyń dana saıasatynyń arqasynda boldy. Qazaqstan Táýelsizdiktiń 26 jylynda bizdiń elmen yntymaqtastyqty damytýǵa múddeli barlyq memlekettermen jáne uıymdarmen dostyq jáne konstrýktıvti qarym-qatynas ornatty», - dedi mınıstr.
Sonymen qatar, Qazaqstan ártúrli halyqaralyq alańdarda, platformalarda, beıresmı forýmdarda jáne kópjaqty jahandyq jáne aımaqtyq kelisimderde tolyqqandy qatysýshy bolyp tabylatyny atap ótildi.
Syrtqy saıasat vedomstvosynyń negizgi mıssııasy dıplomatııalyq qorǵaý quraldarymen bizdiń elimizdiń egemendigin, qaýipsizdigin, aýmaqtyq tutastyǵyn jáne shekaralarymyzdyń myzǵymastyǵyn, basqa memlekettermen ózara qatynastarda jáne halyqaralyq arenada eldiń saıası, saýda-ekonomıkalyq jáne ózge de múddelerin qamtamasyz etý bolyp tabylady.
SІM strategııalyq jáne baǵdarlamalyq qujattardy jáne Elbasynyń joldaýlaryn iske asyrý sheńberinde óziniń aldyna qazaqstandyq dıplomattardyń básekege qabilettiligin arttyrý, kadr saıasatynyń transparenttiligi, dıplomatııany tsıfrlandyrý, sheshimderdegi pragmatızm men ratsıonalızm, álemdik tájirıbeni tartý jáne ozyq dástúrlerge adaldyq, syrtqy saıasat vedomstvosynyń jurtshylyq úshin ashyqtyǵy sııaqty júıeli sıpattaǵy mindetterdi qoıady.
Saltanatty jınalys barysynda mınıstrliktiń qyzmetkerleri, Qazaqstannyń dıplomatııalyq qyzmet ardagerleri vedomstvolyq nagradalarmen jáne «Astana 20 jyl» mereıtoılyq medaldarymen marapattaldy.
Mınıstr basshylar quramy, sondaı-aq ortalyq apparat pen sheteldik mekemelerdiń qyzmetkerlerine kezekti dıplomatııalyq rangtardy berý týraly QR Prezıdentiniń Jarlyǵy jáne Syrtqy ister mınıstrliginiń buıryǵyn oqyp berdi.
Resmı shara barysynda QR Syrtqy ister mınıstrliginiń jas dıplomattary - memlekettik qyzmetkerler Otanǵa jáne halyqqa qyzmet etýge, zańdar men Konstıtýtsııany qatań saqtap, eldiń múddelerin múltiksiz qorǵaýǵa ant etti.
