Syrtqy ister mınıstriniń orynbasary Argentına, Chılı jáne Brazılııaǵa saparlaıdy
Bul týraly QR Syrtqy ister mınıstrliginiń resmı ókili Aıbek Smadııarov aıtty.
«2023 jylǵy 21-24 tamyz kúnderi QR Syrtqy ister mınıstriniń birinshi orynbasary Qaırat Omarovtyń Argentına, Chılı jáne Brazılııaǵa sapary josparlanýda. Argentınada Astana men Býenos-Aıres arasyndaǵy saıası, saýda-ekonomıkalyq jáne gýmanıtarlyq yntymaqtastyqty keńeıtý maqsatynda SІM aralyq saıası konsýltatsııalardyń tórtinshi raýndy ótedi. Sondaı-aq Qazaqstan Respýblıkasynyń Qurmetti konsýldyǵyn ashý, qoǵamdyq jáne saıası toptar ókilderimen kezdesý josparlanǵan», - dedi resmı ókil mınıstrliktiń aptalyq brıfınginde.
Al Chılıde SІM aralyq saıası konsýltatsııalardyń úshinshi raýndyn ótkizý josparlanýda. Kelissózde Tynyq muhıty alıansy sheńberinde ózara tıimdi yntymaqtastyq máseleleri, Qazaqstannyń Ekonomıkalyq yntymaqtastyq jáne damý uıymyna kirý perspektıvalary, elderimiz arasyndaǵy vızalyq rejım, ekijaqty saýda jáne ınvestıtsııa tartý máseleleri talqylanady.
Qaırat Omarovtyń Brazılııaǵa saparynda Qazaqstannyń ınvestıtsııalyq jáne eksporttyq áleýetine arnalǵan jergilikti isker top ókilderimen dóńgelek ústel uıymdastyrý jáne San-Paýlýda Qazaqstan Respýblıkasynyń Qurmetti konsýldyǵynyń ashylýy, Brazılııa Ulttyq ónerkásip konfederatsııasynyń prezıdenti Jılberto Porsello Petrımen kezdesý josparlanǵan.
«Atalǵan elderge saparlar nátıjesinde saýda-ınvestıtsııalyq yntymaqtastyqty qurýǵa jáne halyqaralyq uıymdar aıasynda ózara is-qımyldy jandandyrýǵa baǵyttalǵan jańa kelisimderge qol jetkiziledi dep kútilýde», - deıdi Aıbek Smadııarov.
