Syrtqy ister mınıstri sheteldikterdi Astananyń 20 jyldyq mereıtoıyna shaqyrdy
«Bıyl da Qazaqstanda kóptegen halyqaralyq is-sharalar ótedi. Biz sizderdi elordamyz Astananyń 20 jyldyq mereıtoıyn toılaýǵa jáne belsendi qatysýǵa shaqyramyz. Odan bólek, jaz mezgilinde halyqaralyq ınvestorlardyń kezekti forýmy, Islam ınvestıtsııalyq forýmy jáne ózge de sharalar josparlanǵan. Shilde aıynda Astana halyqaralyq qarjy ortalyǵynyń resmı tanystyrylymy men ınaýgýratsııasy ótedi», - dedi mınıstr Astanada Qazaqstandaǵy ınvestıtsııalyq ahýalǵa arnalǵan birinshi halyqaralyq bıznes-forýmda.
Sondaı-aq, mınıstr Qazaqstandaǵy sheteldik tikeleı ınvestıtsııalar kóleminiń ulǵaıǵanyn atap ótti jáne qıyndyqqa tap bolǵan sheteldik ınvestorlarǵa qol ushyn sozýǵa ázir ekendigin jetkizdi.
«Qazaqstandaǵy jeke sektorda aıtarlyqtaı kúrdeli máseleler joq dep úmittenemin. Degenmen, qazirgi ýaqytta bıznes-orta erekshe qarqynmen damyp keledi. Áriptesim Jeńis Qasymbekten (QR Investıtsııalar jáne damý mınıstri - red.) 2018 jyldyń alǵashqy toqsanynda Qazaqstandaǵy sheteldik tikeleı ınvestıtsııalar kólemi 40%-ke artqanyn bildim. Sondyqtan túrli ınvestorlyq jobalardy júzege asyrýda qandaı da bir kedergilerge tap bolsańyz, esh qysylmastan Mınıstrlik (QR Syrtqy ister mınıstrligi - red.) pen ózge memorgandarǵa saýal joldańyz. Sonymen birge, dıplomatııalyq korpýs pen bıznes-qaýymdastyqtyń ózge de uıymdary arqyly júginýge bolady», - dep eske saldy Qaırat Ábdirahmanov.
Aıta keter bolsaq, Qazaqstan astanasyn Almatydan Aqmolaǵa kóshirý týraly sheshim 1994 jyldyń 6 shildesinde qabyldanǵan edi. Astanany resmı kóshirý 1997 jyldyń 10 jeltoqsanynda júzege asyryldy. 1998 jyldyń 6 mamyrynda Prezıdent jarlyǵymen Aqmola ataýy Astana bolyp ózgertildi.
