Syrtqy ınflıatsııalyq qysym joǵary qalpyn saqtap otyr - Pirmatov
«Syrtqy ınflıatsııalyq qysym álsiregenine qaramastan, joǵary qalpyn saqtap otyr. Azyq-túliktiń álemdik baǵasy tómendep keledi. Alaıda ol sońǵy bes jyldaǵy ortasha mánderden joǵary qalyptasýda. Osyǵan baılanysty Amerıka Qurama Shtattarynda jáne Eýropalyq Odaq elderinde tutynýshylyq ınflıatsııa joǵary deńgeıde qalyp otyr. Eýropa Ortalyq banki ınflıatsııany joǵary mánderde uzaǵyraq qalady dep kútedi. Osyǵan baılanysty Federaldyq rezervtik júıe men Eýropa Ortalyq bankiniń rıtorıkasy bank sektoryndaǵy problemalarǵa qaramastan, kúsheıtilgen qalpynda qalyp otyr», - dedi UB tóraǵasy.
Degenmen, ol AQSh pen Eýropa bank sektoryndaǵy problemalar munaı baǵasynyń dınamıkasyna áser etkenin atap ótti.
«Osylaısha, álemdik ekonomıkanyń retsessııaǵa ushyraý jáne shıkizatqa suranystyń tómendeý táýekelderiniń kúsheıýine baılanysty munaı baǵasy 2023 jylǵy bazalyq stsenarııdegi ortasha eseppen barreline 88 dollar deńgeıinen sál tómen qalyptasty. Osyǵan qaramastan, munaı baǵalary qalpyna kele bastady. Al osy jyly munaı baǵalary Qytaıdaǵy suranystyń jaqsarýynan jáne OPEK+ saıasatynan qoldaý tabady.
2023 jylǵy aqpanda FAO azyq-túlik baǵalarynyń ındeksi ósimdik maıy men sút ónimderi baǵasynyń arzandaýy, sondaı-aq astyq pen et qunynyń azdap tómendeýi nátıjesinde 0,6% tústi. Atalǵan azyq-túlik baǵalary tómendedi, alaıda qant baǵasy qarqyn ala ósti. Baıaýlaǵanyna qaramastan, áli de joǵary qalpynda turǵan ınflıatsııaǵa baılanysty iri ortalyq bankter aqsha-kredıt sharttaryn kúsheıtýdi jalǵastyrdy. Amerıka Qurama Shtattarynyń Federaldy rezervtik júıesi sońǵy otyrysta mólsherlemeni 4,75-5 paıyz dıapazonyna deıin 25 bazıstik tarmaqqa, Eýropa Ortalyq banki 3,5 paıyzǵa deıin 50 bazıstik tarmaqqa kóterdi», - dedi Ǵalymjan Pirmatov.
