Syrqattyń dertin jarııa qylǵan almatylyq dáriger jumystan shyǵaryldy
ALMATY. QazAqparat – Almatyda syrqattyń dertin kópshilikke jarııa qylǵan dáriger jumystan shyǵaryldy. Máseleniń mán jaıyn qalalyq sot málimdedi, dep habarlaıdy QazAqparat tilshisi.
Іs materıaldaryna sáıkes, byltyr 25 mamyr men 26 maýsym aralyǵynda súıek hırýrgııasy bóliminde em alǵan adam 12 maýsymda COVID - 19 indetine shaldyqqany belgili bolǵan. Patsıent bólek palataǵa aýystyrylǵan.
«Al 5 maýsymda dáriger syrqattyń emdeýshi dárigeri bolmasa da, eńbek demalysynda júre turyp, jumys ornyna kelgen. Syrqatty jáne onyń dıagnozy jazylǵan emdik kartochkasyn, qandaı em júrgizilgenin jáne medıtsınalyq mekemege jasaǵan ótinimin fotosýretke túsirip, ony blogerlerge taratqan. Bul aqparat áleýmettik jelige tarap ketken. Eńbek kelisim sharty boıynsha kúdikti 2016 jyly №4 qalalyq aýrýhanaǵa dáriger-hırýrg bolyp jumysqa ornalasqan. 2020 jyldyń tamyz aıynda buıryq shyǵarylyp dáriger jumystan bosatyldy»,- dedi qalalyq sottyń baspasóz qyzmetinen.
«Áleýmettik jelide dárigerdiń kásibı biliktiligine qaramastan jumystan zańsyz shyǵaryldy degen pikir tarap jatyr. Naqty bul jaǵdaıda aq halattynyń kásibı sheberligine sot esh kúmán keltirmegen. Alaıda, zań barshaǵa ortaq. Zańdy belden basý jáne ózgeniń quqyna qol suǵýǵa jol joq» - dedi qalalyq sot mamandary.
Buıryqqa kelispegen ári, jumysqa qaıtarýdy talap etip dáriger sotqa shaǵym túsirgen. Onyń aıtýynsha, kelisim komıssııasynyń bul sheshimi negizsiz.
«Dárigerdiń medıtsınalyq qupııany úshinshi bir adamǵa jarııa qylǵanyn bilgen syrqat medıtsınalyq mekeme basshylyǵyna shaǵymdanǵan. Al sotqa shaǵym berýshi dárigerdiń aıtýynsha indetti juqtyrǵan adam santıarlyq-epıdemıologııalyq sharany esh saqtamaǵan. Sol sebepti indettiń tarap ketý qaýpi tóngen. Alaıda medıtsınalyq qupııa 2020 jyldyń 5 shildede jarııalanǵan. Al syrqat 26 maýsym 2020 jyly tolyq emdelip, úıine shyqqan», - dedi sot mamandary.
Sondaı-aq, sotta belgili bolǵany shaǵym berýshi dáriger syrqattyń indetti ózgerelerge juqtyrýy múmkin ekeni, qandaı da bir qaýip tónip turǵany turaly medıtsınalyq mekeme basshylaryna aıtpaǵan.
Qazaqstan zańnamasyna sáıkes memlekettik jáne zańmen qorǵalǵan qupııalardy jarııa etkende, eńbek mindetin atqarǵan kezde belgili bolǵan aqparattardy qupııa saqtamaǵany úshin jumys berýshi jumysshymen eńbek kelisimshartyn joıa alady.
Em qabyldaǵan azamattyń jeke medıtsınalyq anyqtamalary, medıtsınalyq kómekke júgingeni týraly aqparat, syrqattyń densaýlyǵy, dıagnozy men basqa da málimetterdi dárigerler qupııa ustaýǵa mindetti.
«Dárigerdiń apellıatsııalyq shaǵymy qanaǵattandyrylmady. Sot medıtsına qyzmetkeriniń kásibı biliktiligine esh kúmán keltirmeıdi. Alaıda medıtsınalyq qupııany jarııa etýge jol joq», - dedi qalalyq sottyń baspasóz qyzmetinen.
