«Syrǵalym» telehıkaıasynyń ekinshi maýsymy 3 naýryzda kórermenge jol tartady
ALMATY. QazAqparat - 3 naýryzda «Qazaqstan» ulttyq arnasy arqyly «Syrǵalym» telehıkaıasynyń ekinshi maýsymy kórermenge jol tartady. Jańa bólimde oqıǵa jelisi bank keńsesiniń qabyrǵasynda órbip, jas qyz óz otbasynyń shańyraǵyn shaıqaltpaýǵa tyrysyp, mansap baspaldaǵymen órleýge tyrysady.
Serıal Ulttyq arnanyń tapsyrysymen «Kórkem fılm» kınostýdııasynda túsirildi. Ekinshi kezńedi túsirýge 3,5 aı ýaqyt jumsaldy.
Serıal avtorlarynyń aıtýynsha, jańa kezeńde kórermenderdi jańa keıipkerler - Lıdııa Kadenova men Sáken Raqyshev kútip tur.
Qoıýshy rejısser Rashıd Súleımenov «Syrǵalym» serıalynda basty maqsat ıdeologııalyq nasıhat ekendigin atap ótti.
«Árıne, syrt pishininen ıdeologııalyq maqsat kórinis bermeıdi. Sol arqyly biz óz kórermenderimizdiń sanasynda durys qundylyqtardy qalyptastyrýǵa talpynyp jatyrmyz. Bul qala men aýyldyń birigýi, etnostardyń birigýi. Qazaq tilin nasıhattaý - basty mindet. «Qazaqstan» arnasynyń tyńǵylyqty jumysynyń arqasynda bizde qazaq tili barynsha sahnaǵa beıimdelgen. Túsirilim alańynda eki redaktor jumys jasaıdy, olar qazaq tiliniń durys qoldanylýyn qadaǵalaıdy. Serıalda qazaq tiliniń saýatty qoldanylatynyn bilikti lıngvıster de aıtyp otyr. Bul - biz úshin úlken maqtanysh», - dedi rejısser.
Birinshi bólim 2014 jyldyń basynda kórsetildi. Jańa serıaldy 1 mln-ǵa jýyq adam tamashalady. Keıin «Syrǵalym» serıaly «2014 jyldyń úzdik serıaly» atalymyn, al basty róldi somdaǵan aktrısa Juldyz Mahanova «Eń úzdik aktrısa» ataǵyn jeńip aldy.
