«Syrǵalym» telehıkaıasy tatar tilinde sóıleıdi
ASTANA. QazAqparat - «Qazaqstandyq kontent (qazaq tilinde) arasynda joǵary reıtıng jınaǵan «Syrǵalym» telehıkaıasy «Tatarstan - Novyı vek» (Reseı) telearnasyna satyldy», - dep habarlaıdy «Qazaqstan» RTRK» AQ baspasóz qyzmeti.
Bul - «Qazaqstan» RTRK» AQ-nyń óz qyzmetiniń tıimdiligin joǵarylatý sheńberinde qazaqstandyq kontentti ilgeriletýdegi alǵashqy qadamy. Syrǵalym endi tatar tilinde de sóıleıdi. Qazaqstannyń hıkaıa óndirisinde naǵyz serpilis týdyrǵan 48 serııaly «qazaqtyń Kúlsheqyzynyń» tarıhy týraly túsirilgen hıkaıaǵa sheteldik televızııa mamandary qyzyǵýshylyq tanytyp, atalmysh hıkaıa Reseıdiń reıtıngi joǵary telehıkaıalarymen básekege túsedi.
«Qazaqstan» RTRK» AQ saıtynda telekórermenderdiń daýys berýi nátıjesinde «Syrǵalym» telehıkaıasy «2014 jylǵy úzdik hıkaıa» júldesin ıelense, bas keıipkerdi somdaǵan Juldyz Mahanova «2014 jyly áıel rolin somdaǵan úzdik aktrısa» nomınatsııasyna ıe boldy.
TNV telekórermenderi detektıvtik sıýjetke tán shytyrmanǵa toly oqıǵalardyń, tulǵaaralyq kúrdeli qarym-qatynastar men qupııalardyń kýási bolmaq. Aýyldan kelgen qarapaıym qazaqtyń qyzy - Syrǵalym elordanyń jańa ómirine beıimdele bastaıdy. Boıyna zamannyń úzdik qasıetterin sińire bilgen arý, qazaq qyzyna tán qarapaıymdylyǵy men jan tazalyǵyn saqtap qalady.
Fılmde táýelsiz Qazaqstannyń hıkaıa tarıhynda 1000 sharshy metrden astam aýmaqty qamtyǵan eń qymbat dekoratsııalar paıdalanyldy.
«Syrǵalym» hıkaıasyn «Qazaqstan» RTRK» AQ tapsyrysy boıynsha qazaqstandyq «Kórkem fılm» prodakshn-kompanııasy túsirdi.
