Syrdyń sol jaǵalaýynan 15 aýdan boı kóteredi
QYZYLORDA. QazAqparat - Syrdyń sol jaǵalaýyn ıgerý bas shahardyń kórkine kórik qosary anyq. Qyzylorda endigi jerde jańa jospar aıasynda damyp, iri ózenniń jaıly mıkroklımatyn, tabıǵı ásem kórinisi men tartymdylyǵyn tıimdi paıdalanbaqshy.
ıAǵnı, qoldanystaǵy bas jospar boıynsha munan bylaı ózen qalanyń sáýletine sán beretin bolady, dep habarlaıdy QazAqparat HAA tilshisi.
Al sol jaǵalaýdaǵy aýmaq 15 aýdannan quralady. Onyń 11-i turǵyn aýdan. Buǵan qosa, 1 ındýstrıaldyq aımaq, 3 iri park salynady. Býlvarlar salý da qaralǵan. Bes turǵyn aýdannyń qurylysyna orta qabatty úıler salý josparlanyp otyr. Árbir shaǵynaýdannyń ishinde mektepter men balabaqshalar boı kóteredi. Turǵyndar sanynyń qazirgi dınamıkalyq ósýi esepke alynǵan. Zamanaýı talaptarǵa saı irge kóteretin jańa qonysta 154 myńnan astam halyq turady dep boljanýda. Jalpy, turǵyn úı qurylysy 3 mln sharshy metrdi quraıdy. Buǵan qosa, onda 46 balabaqsha men 23 mektep bolady. Munymen birge 2 kópsalaly aýrýhana, qarttarǵa arnalǵan pansıonat, ınternat emhanalar, kúndizgi statsıonarlar men dárihanalar salý da qarastyrylǵan. Úlken án arenasy, 4 etnografııalyq mýzeı kesheni, Qorqyt ata ınteraktıvti mýzeıi, balalar shyǵarmashylyǵy saraıy, saz mektebi men tsırk, drama teatry, «Qustar álemi» oranjereıasy men Medıa ortalyǵy jańa qonysqa ózindik ajar qosatyn bolady. Sonymen qatar 15 myń kórermenge arnalǵan sport kesheni, jeńil atletterge arnalǵan manej, sport akademııasy men júzý basseıni salynady.
