Syrdyń kúrishi Iranǵa, eti Eýropaǵa eksporttalmaq
QYZYLORDA. QazAqparat - Byltyrǵy jyly Syr dıhandary Iran elinen kúrishtiń jańa surpyn ákelip, jersindirgen edi. Osy kúrishtiń 60 tonnasy bıyl Iranǵa eksporttalady, dep habarlaıdy QazAqparat tilshisi.
Bul týraly jýrnalıstermen ótken brıfıng barysynda Oblystyq aýyl sharýashylyǵy basqarmasynyń basshysy Baqyt Jahanov aıtty.
Basqarma basshysynyń aıtýyna qaraǵanda, bıyl Syrdyń bas daqyly kúrish 9203 gektarǵa artty. Tamyzdyń sońǵy kúnderi kúrishke oraq tústi. Oblys boıynsha kúrishten ózge daqyldar tolyqtaı jınalyp boldy. Bul kúnderi óńirde kartop, kókónis, baqsha ónimderin jınaý jumystary jalǵasyp jatyr.
«Ústimizdegi jyly oblys boıynsha 180,2 myń gektar jerge egis egildi. Aýyl sharýashylyǵy daqyldary ótken jylmen salystyrǵanda 10,9 myń gektarǵa artyq egildi. Munyń basty sebepteriniń biri Syrdarııa ózeninde sý barynsha mol boldy. Jańadan ashylǵan jerlerge kúrish daqyly egildi», - dedi Baqyt Jahanov.
Jalpy óńirde aýyl sharýashylyǵy eksporty 55 paıyzdy qurap otyr.
«Jyl sońyna deıin 1 tonna jylqy eti Eýropaǵa synaq retinde eksportqa jóneltilmek. Buǵan deıin Iranǵa 812 bas qozy jetkizilgen bolatyn. Endigi maqsat onyń sanyn 10 myńǵa deıin arttyrý», - dep atap ótti basqarma basshysy.
