Syrdarııanyń ústimen tórt jolaqty kópir salynady - respýblıkalyq ınvestıtsııalyq forým
QYZYLORDA. 1 naýryz. QazAqparat - Qyzylorda qalasynda eni 14 metr, uzyndyǵy 15 shaqyrymdyq tórt jolaqty aınalma joldyń qurylysy qyzý júrý ústinde.
Búgin Qyzylordada QR Premer-Mınıstriniń orynbasary-Indýstrııa jáne saýda mınıstri Áset Isekeshevtiń qatysýymen ótip jatqan «Baıqońyr» І respýblıkalyq ınvestıtsııalyq forýmynda málim bolǵanyndaı, atalmysh jobanyń jalpy quny 2 mlrd. teńgeden asady. Onyń ilki jumystary ótken jyly respýblıkalyq bıýdjet esebinen bastalyp ketti. Al nysan 2014 jyly tolyq aıaqtalýy tıis. Aınalma joldyń eki jaq betine 205 ga aýmaqta «Araı» shaǵynaýdany salynatyn bolady. Munda kópqabatty turǵyn úıler, kottedjdi qalashyq, saýyqtyrý keshenderi men mektep, balabaqsha nysandary boı kótermek.
Sol sııaqty darııanyń sol jaǵalaýyn keshendi ıgerý úshin bıylǵy jyly Ǵ. Muratbaev kóshesi arqyly Syrdarııa ózeniniń ústinen salynatyn aspaly tórt jolaqty kópirdiń jobalaý-smetalyq qujattary ázirlenýde. Kópir qurylysy bıyl bastalyp, kelesi jyly paıdalanýǵa beriledi.
Aınalma jol men aspaly kópirdiń salynýy aldaǵy kúnderi ózenniń sol jaq jaǵalaýynda qalanyń jańa ortalyǵyn qalyptastyrýǵa múmkindik beredi. Nátıjesinde, bul aýmaqta bas josparǵa sáıkes kópqabatty turǵyn úıler men áleýmettik nysandar, bıznes, oıyn-saýyq ortalyqtar boı kóteretin bolady.
