Syrdarııanyń sol jaǵalaýynda elektr jelileri tartylady

QYZYLORDA. QazAqparat - Qyzylorda qalasyndaǵy Syrdarııa ózeniniń sol jaǵalaýyn elektr qýatymen jabdyqtaý máselesi bıyl júzege asady, dep habarlaıdy QazAqparat tilshisi.

Ol oblystyq bıýdjet qarajaty esebinen júrgiziledi. Onda birinshi kezekte 35 kV elektr qýatymen qamtylady. Bul týraly oblys ákiminiń orynbasary Serik Súleımenov málimdedi.

«Syrdarııa ózeniniń sol jaǵalaýyn ıgerý jónindegi sheshim QR Úkimetiniń 2009 jylǵy 17 shildedegi qaýlysymen bekitilgen Qyzylorda qalasynyń bas jospary negizinde qabyldanǵan», - dedi oblys ákiminiń orynbasary Serik Súleımenov.

Aıta keteıik, sol jaǵalaýdaǵy qala bóligi 1532 gektardy quraıdy. Onyń 367 gektary - rekreatsıalyq aımaqtar qurýǵa, 537 gektary - turǵyn úıler, 190 gektary - saýda jáne ofıstik ǵımarattar, 270 gektary áleýmettik ınfraqurylym obektileriniń qurylysyna arnalǵan.

Oblys ákiminiń orynbasary «Qyzylorda oblysy Syrdarııa aýdany Aqjarma eldi mekenindegi elektrmen jabdyqtaý júıesin qaıta jańǵyrtý» jobasy boıynsha da qurylys-montaj jumystary júrip jatqanyn aıtty.