Syrdarııaǵa jaqyn ornalasqan apattyq mektep ornyna jańasy salynady
QYZYLORDA. QazAqparat - Syrdarııa ózeniniń boıyna jaqyn ornalasqan apattyq jaǵdaıdaǵy mekteptiń ornyna jańasyn salý josparlandy, dep habarlaıdy «QazAqparat» HAA.
«Sońǵy bes jylda oblys boıynsha 45 mektep salyndy, onyń ishinde 37 apattyq mektep qaıta salynyp, paıdalanýǵa berilgendigin atap ótkim keledi. Osy arqyly óńirde apattyq mektepterdiń máselesi sheshimin taýyp otyr. Degenmen, 2018 jyldyń qańtarynda táýelsiz ekspertterdiń qorytyndysyna sáıkes Jalaǵash aýdany, M.Shámenov aýylynda ornalasqan № 34 orta mektep apattyq dep tanyldy. Syrdarııa ózeniniń boıyna jaqyn ornalasqandyqtan jer asty sý deńgeıiniń kúrt kóterilýi mekteptiń búgingi jaǵdaıyna ákelip soǵyp otyr» - deıdi Qyzylorda oblysy ákiminiń orynbasary Rýslan Rústemuly.
Sonymen birge R. Rústemuly aýdandyq bıýdjet esebinen memlekettik saraptamadan ótkizilgen 300 oryndyq mekteptiń joba smetalyq qujattary ázirlenip, joba quny 900,6 mln teńgeni qurap otyrǵandyǵyn da jetkizdi.
«Mektep qurylysyn júrgizýge baılanysty qujattar QR Bilim jáne ǵylym mınıstrligine usynylyp, respýblıkalyq bıýdjetten qarjy bólý máselesi boıynsha tıisti mınıstrliktermen jumystar atqarylýda» ,- dedi ol.
Aıtyp ótý kerek, №34 mektep 1991 jyly paıdalanýǵa berilgen, qazirgi ýaqytta munda І aýysymda 105 oqýshy, ІІ aýysymda 123 oqýshy bilim alýda.
