Syrdarııadan qaýip joq, dıqanǵa sý jetkilikti
QYZYLORDA. QazAqparat-Syrdarııadaǵy seń tolyqtaı teńizge jetti, búginde darııa boıynda eshqandaı qaýip joq. Bul týraly QazAqparat HAA tilshisi Aral-Syrdarııa basseındik ınspektsııasyna silteme jasap habarlady.
Búgingi tańda «Toqtaǵul» sý qoımasynda 12 mıllıard 770 mıllıon tekshe metr sý tur. Odan tómen qaraı sekýndyna 362 tekshe metr sý bosatylsa, «Qaıraqqum» sý qoımasynan oǵan sekýndyna 820 tekshe metr sý qosylady. Shardaraǵa kelip jatqan sý mólsheri sekýndyna 1200 tekshe metrdi quraıdy. Tómen qaraı 1000 tekshe metr sý túsip jatyr.
«Kóksaraı» sý rettegishi qazirgi kúni 2 mıllıard 800 mıllıon tekshe metr sýdy ustap tur. Áli de 200 mıllıon tekshe metr sý qabyldaýǵa qaýqarly. Arys ózeninen sekýndyna 219 tekshe metr sý kep Syrdarııaǵa quıylýda. Qyzylorda sý torabynan bul kúnderi sekýndyna 521 tekshe metr sý ótip jatyr. Uly teńizge onyń 380 tekshe metri jetýde. Naýryz aıynyń sońynda darııadaǵy muz tolyqtaı teńizge jetti.
Syrdarııada búginde qaýip joq. Sondaı-aq, dıqandar qaýymy úshin jaǵymdy jańalyq - bıylǵy eginge sý mólsheri jetkilikti bolatyn túri bar.
