Syrdarııadan bıyl sý tasqynynyń qaýpi joq - Qyzylorda oblysy
QYZYLORDA. QazAqparat - Kóktem shyǵa Qyzylorda oblysyndaǵy eldi mekenderge Syrdarııa ózenindegi muz qaýip tóndiretini bar. Mamandar bıylǵy jyly darııa boıyndaǵy qaýiptiń azaıǵanyn alǵa tartyp otyr. Bul týraly QazAqparat HAA tilshisi habarlady.
Aral-Syrdarııa basseındik ınspektsııasynyń málimetterine súıensek, búgingi kúni bas sý qoımasy Toqtaǵulda 13 mlrd. 720 mln. tekshe metr sý tur. Odan tómen qaraı sekýndyna 617 tekshe metr sý bosatylýda. Al Shardara sý qoımasyna sekýndyna 1491 tekshe metr kelip quısa, odan tómen qaraı 850 tekshe metr jiberilýde. Búgingi kúni Shardarada 4 mlrd. 481 mln. tekshe metr sý bar.
Sondaı-aq ózbek aǵaıyndardyń Arnasaı kanalyna 50 tekshe metr sý barýda. Kóksaraı sý rettegishi jolshybaı sekýndyna 500 tekshe metr sýdy qabyldap jatyr. Ondaǵy sý kólemi 2 mlrd. 540 mln tekshe metrdi quraıdy. Darııaǵa Arys ózeninen sekýndyna 104 tekshe metr sý kelip qosylý ústinde. Bul bıylǵy jaýyn-shashynnyń kóp bolýynan týyndap otyrǵan jaıt. Qyzylorda sý torabynan naqty kezeńde 408 tekshe metr sý ótip jatsa, Kishi Aralǵa onyń 203 tekshe metri jetip jatyr.
Darııadaǵy muz Qyzylorda qalasynan 30 shaqyrym joǵary jerde ustasyp tur. Muzdyń qalyńdyǵy 10-15 santımetrdi quraıdy. Kúnniń jylynýynan muz ýaqyt óte juqaryp keledi. Mamandar darııadaǵy muzdyń júrýi aldaǵy 4-5 kún ishinde bolýy tıis degen meje aıtyp otyr. Bıyl negizgi sýdyń qory mol. Degenmen darııadan ótip jatqan sý kólemi birshama azaıtylǵan. Sol sebepti de qaýip joq deýge bolady. Osyǵan qaramastan tıisti mekemeler darııa boıyn kúni-túni baqylaýda ustap tur.
