Syrdarııadaǵy jaǵdaı: Bógetti jaryp ótken sýdy aýyzdyqtaý múmkin bolmaı otyr
QYZYLORDA. QazAqparat - Qyzylorda oblysyna qarasty Syrdarııa aýdanynda tótenshe jaǵdaı jarııalanǵan bolatyn. Darııa arnasynan asyp, Qaljan-ahýn aýylynyń 2300 gektar jerin basyp qaldy.
Onyń jeti júz gektar jeri egistik alqaby. Buǵan qosa bógettiń 10 tusynan jaryp ótken sýdy aýyzdyqtaý da múmkin bolmaı otyr.
Qyzyl sýdyń astynda qalǵan «Baq» sharýa qojalyǵynyń egistik alqaby. Ótken jyly kúrishtiń ár gektarynan 73 tsentnerden ónim alǵan kúrishshiler qazir ózennen aqqan sýmen kúresýde. Qaptardy qumǵa toltyryp, bekitý sharalaryn júrgizýde. Sondaı-aq, sý buzyp ketken bóget qaıta qalpyna keltirilip jatyr. Bul jumysqa arnaıy tehnıkalar tartylǵan. Jergilikti sheneýnikter turǵyndarǵa qaýip tónip turǵan joq ekenin aıtady.
«Qazirgi tańda ózen sýy aýyldan bes jarym shaqyrym qashyqtyqta. Turǵyndarǵa qaýip joq. Uzyndyǵy alty shaqyrym bolatyn bógetti qalpyna keltirip jatyrmyz. Tehnıka jetkilikti túrde jumyldyryldy. Sý alǵan egistik alqaby egin naýqanyna deıin retke keltiriletin bolady. Arnaıy sorǵy qurylǵylary arqyly tazartylady», - deıdi Syrdarııa aýdany ákiminiń orynbasary Baqytjan Lekerov.
Jarııalanǵan tótenshe jaǵdaıǵa qaramastan jaýapty mamandar Syrdarııadaǵy jaǵdaı birqalypty deıdi. Joǵarydan qazirgi kúni ózenge sekýndyna 320 tekshe metr sý kelip túsýde. Al muzdardyń keptetilip qalýyna aýa raıynyń qolaısyzdyǵy sebep bolǵan.
Aıta keter jaıt, aldaǵy kúnderi jarylǵysh zattardy paıdalaný josparlanyp otyr.
Aınur Tóleshova
