Syrdarııadaǵy seń Qyzylorda tusynan kedergisiz ótti
QYZYLORDA. QazAqparat -Syrdarııa ózenindegi seń Qyzylorda qalasy tusynan kedergisiz ótti, dep habarlady QazAqparat tilshisi.
Qazirgi ýaqytta ózen deńgeıi 85 santımetrge deıin tómendep, sekýndyna 210 tekshe metr sý jóńkile aǵyp jatyr. Alda áli 63 shaqyrym bar. Mamandar ózen boıynda kezekshilik uıymdastyryp, jaǵdaıdy kúndiz-túni baqylaýda ustap otyr. Asaý minezdi Syrdarııa jyl saıyn kóktemde ábigerge salady. Bıyl biraq, jaýyn-shashynnyń kóp bolýynan muz erte eridi. Joǵarydan quıylyp jatqan sýdyń kólemi de asa mol emes. Sondyqtan, baıaý aǵys seńniń kedergisiz júrýine sep bolýda. «Qazsýshar» RMK Qyzylorda oblystyq fılıaly dırektorynyń orynbasary Jorabek Ernazarov darııadaǵy ahýaldyń qaýipsizdigin alǵa tartty.
«Búgingi tańda joǵarydan 1200 tekshe metr sý túsip jatyr. Shardara sý qoımasynda 4,2 mıllıard kóleminde sý jınalǵan. Áli de jınaqtaıdy dep otyrmyz. Onyń 400 tekshe metrin Kóksaraı sý rettegishine quıylýda, Arys ózeniniń sýyn qosqanda 160 tekshe metr sý osy Qyzylorda oblysyna kirip jatyr»,-deıdi ol.
Mamandardyń esebinshe, ózen boıynda sý basý qaýpi joǵary 56 ýchaske bar. Darııa deńgeıinen tómen ornalasqan Tereńózek kentiniń tusy eń osal dep tanyldy. Sondaı-aq, sol jaǵalaýdy da sý shaıady degen qaýip boldy. Sonyń bárin eskere kele óńirde arnaıy jol kartasy ázirlendi. Qarajat bólinip, bógetterdi nyǵaıtý, gıdronysandardy jóndeý jumystary der kezinde qolǵa alyndy.
«Sol jaǵalaýdy qorǵaý maqsatynda byltyr 293 mıllıon teńge Úkimettiń rezervinen berilgen bolsa, bıyl soǵan qosymsha 2 mıllıard 656 mıllıon teńge qarjy bólinip, jumystar qazir jalǵasyp jatyr. Sý basýǵa jol bergen joqpyz dep aıtýǵa bolady. Degenmen, arqany keńge salýǵa bolmaıdy. 500-ge jýyq tehnıka, 200-ge jýyq mekeme ujymy ózen boıyn baqylaýda ustap otyr. Evakýatsııalyq jınaqtaý, qabyldaý pýnktteri ázir», - deıdi oblystyq jumyldyrý daıyndyǵy basqarmasynyń basshysy Serik Sermaǵambetov.
Foto: meteovesti.ru
