Syrdarııadaǵy ruqsatsyz qazba jumystary ekologııalyq apatqa aparyp soǵýy múmkin
Bul jóninde depýtat Bas prokýror Berik Asylovqa, Ekologııa jáne tabıǵı resýrstar mınıstri Erlan Nysanbaevqa, Sý resýrstary jáne ırrıgatsııa mınıstri Nurjan Nurjigitovke saýal joldady.
«Túrkistan óńirinde 60-qa jýyq ózen bar, al Syrdarııa – transshekaralyq respýblıkalyq mańyzy bar strategııalyq ózen. Elimizdegi ózenderdiń mańyzdylyǵyna mán berip, qaýpin eskermeıtin kásipkerler belgilengen sý qorǵaý aımaqtary men beldeýine kirip, qum men tas jáne ózge de paıdaly qazbalardy óndirip, tabıǵatqa orasan zalal keltirýde. Ruqsatsyz qazba jumystary saldarynan Syrdarııa men basqa da ózenderdiń arnasy buzylyp, sýy tartylyp barady», - dedi Q. Balabıev Májilistiń jalpy otyrysynda.
Onyń aıtýynsha, elimizge sý resýrstarynyń 51 paıyzy kórshi memleketterden keledi.
Ońtústik óńirde jer qoınaýyn zańsyz paıdalanýshylarǵa qarsy kúres júrgizilgenimen, ózen jaǵalaýyndaǵy qazba jumystary toqtaýsyz júrip jatyr.
«Qazir Syrdarııa ózeniniń jaǵalaýynda 100-den asa jer qoınaýyn paıdalanýshy karerler jumys júrgizýde. Ruqsatsyz júrgizilgen qazba jumystary kesirinen Syrdarııa men Arys jaǵalarynda 70 gektarǵa deıin qazylǵan jerler bar, al Aqsý ózeniniń tabanynan tas alý kezinde 40 metr tereńdikte qazylǵan. Ǵaryshtyq monıtorıng kezinde ózender jaǵasyndaǵy atalǵan ózgeristerdiń oryn alǵany anyqtalǵan. Óńirdegi basqa ózender de osyndaı aýyr jaǵdaıda bolǵandyqtan quzyrly organdardyń aralasýyn qajet etedi», - deıdi depýtat.
Q. Balabıev óńirdegi strategııalyq mańyzy bar Syrdarııa jáne de basqa da ózender jaǵasynda qazba jumystary osy qarqynda jalǵasa berse, sý qumǵa sińip, jaqyn bolashaqta sýsyz qalý qaýpi baryn jetkizdi.
«Onsyz da Syrdarııanyń ózeniniń sý deńgeıiniń tómendeýinen Aralǵa jetpeı jatyr emes pe? Osy zańsyz áreketterge baılanysty mazmundy suraq týyndaıdy – karerler jumysy nelikten betimen ketken? Árbir memlekettik organ óz mindetin durys atqaryp otyrsa, birde-bir zańsyz karer bolmas edi. Olarǵa tosqaýyl qoıyp, ruqsatsyz áreketterin birjolata toqtatý kerek. Osyǵan oraı Syrdarııa jáne de basqa ózenderge ekologııalyq apattqa ushyraý qaýpi tóngenin eskerip, sizderden atalǵan máselelerdi sheshýdi suraımyn», - dedi Qaırat Balabıev.
