Syrdarııada sý tasý qaýpiniń beti qaıtty
QYZYLORDA. QazAqparat - Qyzylorda oblysy jumyldyrý daıyndyǵy basqarmasynyń basshysy Serik Sermaǵambetovtyń aıtýynsha, ózen boıynda táýlik boıy kezekshilik bekitilip, qajetti qaýipsizdik sharalary qabyldandy, dep habarlady QazAqparat tilshisi.
Esterińizge sala keteıik, 28 jeltoqsan kúni Syrdarııa ózeninde sý deńgeıi kóterilip, Syrdarııa ózeniniń eski arnasy tolysyp, PMK-29 saıajaıynda 9 turǵyn jaıdyń aýlasyna sý jaıylǵan.
«Saıajaı massıvinde barlyǵy 76 úı bar, onyń ishinde 37-si jyl boıy paıdalanylady. Qazirgi kezde sý tasqynynyń aldyn alý sharalary aıasynda turǵyndary qaýipsiz jerge kóshirildi. Sondaı-aq, uzyndyǵy 100 m jýyq arnanyń qorǵaý dambalaryn bekitý maqsatynda 8 tehnıka jáne 15 adam jumyldyrylyp, 22 jaýapty uıymdardyń táýlik boıy kezekshiligi bekitildi», - dep málimdedi Serik Sermaǵambetov.
Atap óteıik, PMK-29 saıajaıy ózen arnasyndaǵy sý deńgeıi joǵarylaý kezeńderinde sý jaıylatyn aımaq bolǵandyqtan turǵyndarǵa aldyn-ala eskertpe hattar taratylǵan. Degenmen, 28 jeltoqsan kúni túnge qaraı Qyzylorda qalasy mańyndaǵy Prýdhoz eldi mekenindegi Kentaı jaıylymyndaǵy sý basqan aýmaqta 2 adam masań kúıde qarańǵyda adasyp, muz astyna túsken. Bireýi qaıtys boldy, ekinshisi qutqarydy.
Jalpy oblys aımaǵyndaǵy jaǵalaý boıynda qorǵaý dambalarynyń 96 qaýipti ýchaskesi belgilenip, jóndeý jáne qalpyna keltirý jumystary júrgizildi. Odan bólek, Syrdarııa jaǵalaýy 56 sý basý qaýpi bar aımaqqa bólinip, quramynda 459 arnaıy tehnıka jáne 1957 adamy bar 172 jaýapty mekeme bekitildi. Sý tasqyny kezeńinde turǵyndardy evakýatsııalaý úshin 83 jınaqtalǵan evakýatsııalyq jáne 104 qabyldaý beketi daıyndaldy. Sondaı-aq, oblys boıynsha 148 tonna janar-jaǵarmaı, 284200 dana qap, 10400 qamys, 3800 pashyn, 3600 dana qarabýra jáne ózge de qajetti materıaldar men quraldar ázirlendi.
Basqarma málimetine súıensek, 30 jeltoqsandaǵy jaǵdaı boıynsha Qyzylorda oblysynda ózennen túsken sý kólemi sekýndyna 640 tekshe metrdi quraıdy. Qyzylorda sý torabyna túsken sý kólemi sekýndyna 530 tekshe metr. Soltústik aýdandarda aýa temperatýrasynyń tómendeýine baılanysty Syrdarııa ózeninde muz qatty, al ońtústik aýdandarda muz paıda bolý jaǵdaılary anyqtalmady.
«Qazirgi tańda aımaqta jaǵdaı qalypty jáne turaqty baqylaý júrgizilip jatyr», - dedi S.Sermaǵambetov.
