Syrdarııada sý deńgeıi kóterildi
QYZYLORDA. QazAqparat - Syrdarııa ózeninde sý deńgeıi kóterildi. Qazirde sý basý qaýpiniń aldyn alý maqsatynda PMK-29 aýmaǵyn bekitý jumystary júrgizilýde, dep habarlady QazAqparat tilshisi.
Keshe ózen arnasyndaǵy muz keptelisteri saldarynan sý deńgeıi kóterilip, Syrdarııa ózeniniń eski arnasy tolyp, PMK-29 saıajaıynyń ishki kanalyna kóp mólsherde sý aǵýynan turǵyn jaıdyń aýlasyna sý jaıylǵan.
Jalpy, PMK-29 saıajaıy ózen arnasyndaǵy sý deńgeıi joǵarylaý kezinde sý jaıylatyn aımaq bolǵandyqtan turǵyndarǵa aldyn ala eskertpe hattar taratylǵan.
Saıajaıda barlyǵy 36 turaqjaı bar. Onyń ishinde adamdardyń qysy-jazy turaqty turyp jatqany - 2 otbasy.
«Osyǵan baılanysty bekitilgen jaýapty mekemelerdiń arnaıy tehnıkalaryn (6 júk kóligi, 1 traktor, 1 ekskavator) jumyldyra otyryp, sý jaıylýdyń aldyn-alý maqsatynda topyraqpen bekitý jumystary júrgizilýde. Saıajaıdy sý basý qaýpi týyndaǵan jaǵdaıda aldyn alýǵa jumyldyrylatyn barlyq kúshter men quraldar daıyn», - dedi oblystyq jumyldyrý daıyndyǵy basqarmasynyń basshysy Serik Sermaǵambetov.
