Syrdarııada «Dombyra-dastan» mádenı sharasy ótti
SYRDARIıA. QazAqparat - Qyzylorda oblysy Syrdarııa aýdanynyń ortalyǵy - Tereńózek kentinde «Dombyra-dastan» ataýymen mádenı shara ótkizildi, dep habarlaıdy QazAqparat tilshisi.
Atalmysh shara barysynda Syrdarııa aýdanynyń ákimi Rýslan Rústemov jınalǵan kópshilik aldynda ulttyq qundylyqtardy ulyqtaýǵa mańyz berý qajettigin atap ótti.
«Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynda ulttyq qundylyqtardy dáripteýge erekshe basymdyq berilgen. Dombyra halqymyzdyń ulttyq kásibı óneriniń qalyptasýyna, órkendeýine negiz boldy. Baıjigit, Qurmanǵazy, Dáýletkereı, Táttimbet, Seıtek, Qazanǵap, Súgir, Toqa sekildi dańqty kúıshilerdiń tókpe, shertpe kúı dástúrlerin bıikke kóterip, qaldyrǵan tamasha týyndylary biz úshin baǵa jetpes qundylyq. Jalpy, dombyra aspabynyń tarıhy tereńde ekenin uǵynamyz. Sondyqtan halqymyzdyń ulttyq aspaby dombyraǵa qurmet retinde shilde aıynyń birinshi jeksenbisin «Ulttyq dombyra kúni» retinde atap ótý arnaıy Jarlyqpen belgilendi. Qazaqtyń qara dombyrasy - jáı ǵana qural emes, bizdiń tilimizben, dilimizben, rýhymyzben úndes qasıetti aspap. Qanshama qıyndyqtarda tar jol, taıǵaq keshý zamandarynda qazaqqa súıenish bola bilgen qara dombyramyzdyń ǵumyry máńgi bolsyn», - dedi aýdan ákimi Rýslan Rústemov.
Saltanatty shara barysynda aýdandyq mádenıet úıiniń kórkemónerpazdary men áýez mektebiniń oqýshylary jyr-termeler oryndady. Kópshilik nazaryna aıtys pen kúı tartys usynyldy. Mýzeı qoryndaǵy eksponattardan jasaqtalǵan kórme tanystyryldy.
