Syrdarııada balyq aýlap júrgenderdiń motorly qaıyǵy jarylǵan, bir balyqshy tabylmaı jatyr (FOTO)
ASTANA. QazAqparat - Syrdarııa ózeniniń da Arys aýdanyna qarasty aýmaǵynda 7 qańtar kúni eki balyqshy sýǵa aǵyp ketken. Bul týraly OQO tótenshe jaǵdaılar departamentine qarasty apattyq-qutqarý jasaǵynyń mamandary málim etti, dep habarlaıdy otyrar.kz.
Aqqala aýylynyń eki turǵyny balyq aýlaýǵa attanǵan. Arada birer saǵat ótkende kenetten motorly qaıyqtyń janarmaı bagy jarylǵan. Ózen ústindegi jarylysty kórip, daýysty estigen aýyl turǵyndary da bar.
«Bul jaıynda sýyt habar 7 qańtar kúni 12:10-da tústi. Saǵat 13:00-de bizdiń jasaqtyń 5 qutqarýshysy oqıǵa ornyna attandy. Saǵat 15:55-te darııanyń jaǵasyna jetken súńgýirler qutqarý jumystaryn bastap ketti», - deıdi OQO tótenshe jaǵdaılar departamentine qarasty apatty-qutqarý jasaǵynyń resmı ókili Pavel Vıshenın.
Sol tóńirektegi turǵyndar balyqshynyń bireýin sýdan shyǵaryp alyp, jedel járdem shaqyrǵan. 39 jastaǵy Aqqala aýyly turǵynynyń jaǵdaıyn Arys qalalyq aýrýhanasynyń dárigerleri ortasha dep baǵalap otyr. Balyqshynyń mıy shaıqalǵan, ashyq bas-mı jaraqatyn alǵan.
Al 29 jastaǵy ekinshi balyqshy áli de izdestirilýde. Qutqarýshylar 5 metr tereńdikke deıin súńgip, darııanyń túbin muqııat qarap jatyr. Olardyń jumysyna darııanyń asaý aǵysy da kedergi bolýda. Ázirge bagy jarylǵan qaıyqty da tabý múmkin bolmaı otyr.
