Syrdarııa ústine taǵy bir kópir salynady
QYZYLORDA. QazAqparat- Qazaly aýdanyndaǵy Bekarystan bı, Maıdakól, Túktibaev, Jalpaq aýyldary kóp jyldan beri ózenniń ústindegi qalqymaly kópirdi paıdalanyp keledi.
Alaıda darııa betine muz qatqan sátte ótkel alynady da, qatynas kúrdelene túsedi. Qazaly aýdanynyń ákimi Najmadın Shamuratov Maıdakól aýyldyq okrýginde ótken esepti kezdesýinde osy kúrmeýli másele bıyl sheshimin tabatyndyǵyn málim etti, dep habarlady QazAqparat HAA tilshisi.
Syrdarııa ústimen «Álseıit» ótkeli salynatyny josparlanýda. Jańa kópir qurylysyna respýblıkalyq jáne oblystyq bıýdjetten 550,0 mln. teńge bólingen.
Sondaı-aq jıyn barysynda málim bolǵandaı, okrýg boıynsha 52 kásipker tirkelip, jumys jasaýda. Olardyń 25-i sharýa qojalyǵy, 27-i jeke kásipkerler. Sonymen birge, 1 aýylsharýashylyq kooperatıvi quryldy.
Ótken jyly «Rza - Agro» JShS men «Aımahanov» sharýa qojalyǵy tarapynan 560 ga kúrish egilip, odan orta eseppen 51,0 tsentner ónim alyndy. 200 ga kóne jońyshqa men 150 ga jańa jońyshqa egilip, kútimge alyndy.
