Syrdarııa ýnıversıteti Táshenovtiń esimimen atalady ári Shymkentke kóshiriledi

NUR-SULTAN. QazAqparat – Úkimet jáne tıisti mınıstrlik qoldaýymen Syrdarııa ýnıversıtetine Jumabek Táshenovtiń esimi berildi. Buǵan qosa oqý orny Shymkent qalasyna kóshiriledi, dep habarlaıdy QazAqparat tilshisi.

Osylaısha, búginge deıin Túrkistan oblysynda ornalasqan Táshenov ýnıversıteti endi Shymkenttegi Kemel Toqaev kóshesinen oryn tebýi múmkin.

«1998 jyly Jetisaı qalasynda ashylǵan Syrdarııa ýnıversıteti búginde tarıhy men dástúri qalyptasqan jeke joǵary oqý oryndarynyń birine aınaldy.

Osyǵan baılanysty oqý ornyna jerlesimiz, belgili memleket jáne qoǵam qaıratkeri Jumabek Táshenovtiń atyn berý usynylyp, ol biraýyzdan qoldaý tapty. Sondaı-aq, Úkimet jáne Ǵylym jáne joǵary bilim mınıstrligine ýnıversıtetti Shymkent qalasyna kóshirý týraly usynys joldandy.

Endi J.Táshenev atyndaǵy ýnıversıtet jańa oqý jylyn úshinshi megapolıs tórinde bastamaq», - dedi ýnıversıtet rektory Qanat Baıbolov.

Qazirgi tańda ýnıversıtet bakalavrıattyń 13 baǵyty boıynsha - 31, magıstratýranyń 5 baǵyty boıynsha 6 mamandyq ıelerin oqytady.

Qanat Baıbolovtyń dereginshe, oqý ornynda 850 stýdentke arnalǵan 4 jataqhana bar.