Syrdarııa sýy «Daldabaı» jáne «Qyzyltam» aýyldary arasyndaǵy joldy basyp qaldy
QYZYLORDA. QazAqparat - Aǵymdaǵy jyldyń 21 naýryzynda Syrdarııa ózeninde seńniń turyp qalýy saldarynan arnasynan asqan sý Jalaǵash aýdany «Daldabaı» jáne Qarmaqshy aýdany «Qyzyltam» eldi mekenderi arasyndaǵy oblystyq mańyzy bar joldy basyp qaldy, dep habarlaıdy tilshisi.
Kólik qozǵalysy toqtatyldy, jergilikti polıtsııa qyzmeti kúshimen beket qoıylyp, kezekshilik uıymdastyryldy.
TJD bólimsheleriniń kúshimen (15 adam, 2 birlik tehnıka) jergilikti atqarýshy organdarmen birlesip (70 adam, 5 birlik tehnıka) uzyndyǵy 400 metr avtojol boıynda joldy topyraqpen bekitý jumysy júrgizildi.
Jergilikti atqarýshy organdar sý asyp ketpeý úshin bóget jasaýǵa 100 tonnaǵa jýyq ınertti materıal ákelip, 2500 dana qap topyraq saldy.
21 naýryzynda 18 saǵat 30 mınýtta sýdyń arnasynan asýy toqtady. Eldi mekenderdi sý basý qaýpi joq. Ózendegi sýdyń deńgeıi tómendedi, seń júrip jatyr.
TJD qyzmetkerleriniń kúshimen muzdyń ótýine monıtorıng júrgizilýde.
