Syrdarııa ózeniniń tasý sebebi anyqtaldy
ASTANA. QazAqparat - Syrdarııa ózeniniń sýy arnaǵa muzdyń keptelýi saldarynan tasyǵan, dep habarlaıdy QazAqparat.
QR ІІM Tótenshe jaǵdaılar komıtetiniń resmı ókili Rýslan Imanqulovtyń aıtýynsha, jeke turǵyn úıler men basqa qurylys nysandaryn sý basqan joq. Habar kelip túsken sátten bastap jaıylǵan sýdy joıý jáne jaǵalaýlardy nyǵaıtý jumystaryna jergilikti atqarýshy organdar 80 adam men ekskavator, býldozer, KamAZ syndy 16 tehnıkany jumyldyrǵan. Sý asyp tógilgen jaǵalaýlar anyqtalyp, topyraq tógilgen.
«Qalpyna keltirý jumystary jalǵasýda. Jaqyn ornalasqan eldi mekenderdi sý basý qaýpi joq. Qazirgi ýaqytta jumyldyrylǵan adam kúshi jáne tehnıkanyń kómegimen bıiktigi 1, eni 4-5 metr bolatyn 1300 metrlik topyraq úıildi»,- dedi Rýslan Imanqulov.
Eske salsaq, buǵan deıin Qyzylorda oblysynda aýyl sharýashylyǵy maqsatyndaǵy jerler sý astynda qalyp, Syrdarııa aýdany boıynsha tótenshe jaǵdaı jarııalanǵandyǵy týraly habarlaǵan bolatynbyz.
