Syrdarııa ózeniniń Qyzylordaǵa jaqyn tusynda muz júrdi
QYZYLORDA. QazAqparat - Syrdarııa ózeniniń Qyzylorda qalasy tusyndaǵy Tasbóget sý beketinde jıektik muzdar men qabyrshaq muzdyń júrýi baıqalady, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
«Qazgıdromet» sharýashylyq júrgizý quqyǵyndaǵy RMK Qyzylorda oblysy boıynsha fılıalynyń dırektory Juldyz Qalymbetovanyń aıtýynsha, darııadaǵy jaǵdaı qatań baqylaýda tur. Búginde oblystyń soltústik aýdandarynda tolyqtaı muz qalyptasqan. Al, Tasbóget sý beketinde jıektik muzdar men qabyrshaq muzdyń júrýi baıqalady.
«Aýa raıynyń qubylmalylyǵynan, jaýyn shashyn, sondaı-aq, muzdyń erýinen sý deńgeıi birshama kóterildi.
Aıta ketý kerek, «Qazgıdromettiń» málimeti boıynsha, 10-13 qańtar kúni aýa temperatýrasy túnde -10 -15, soltústik aýdandarda -20 -25, ońtústik aýdandarda -5 -10 aıaz bolady degen boljam bar. Keı jerlerde tuman, kóktaıǵaq bolyp, jel kúsheıedi», - dedi J. Qalymbetova.
Odan keıin aýa temperatýrasy azdap joǵarylap, oblys boıynsha qar, ońtústik aýdandarda jaýyn-shashyn bolady. Aýa temperatýrasy túnde -5 -10, keı jerlerde 0 gradýs aıazǵa deıin, kúndiz 0 -5, keı jerlerde -8 aıazǵa, ońtústik aýdandarda 0 +5 jylyǵa deıin joǵarylaıdy. Keıin aýa raıy qaıta sýytýy múmkin.
Biz budan buryn Qyzylorda tusynda Syrdarııa sýy bógetti buzyp ketkenin habarlaǵan edik.
Sondaı-aq, Qyzylordada Syrdarııanyń sýy tasý qaýpi týyp turǵany aıtyldy.
Esterińizge sala ketelik, 25 jeltoqsanda Qyzylorda oblysy Qazaly aýdany aýmaǵynda darııa boıyndaǵy qorǵanys bógeti jaryldy.
Al odan keıin Qazgıdromet Syrdarııanyń arnasynan shyǵyp ketýi múmkin ekenin habarlady.
