Syrdarııa ózenine batyp ólgisi kelgen áıel qutqaryldy - Qyzylorda
QYZYLORDA. QazAqparat - Sáýir aıynyń 6-sy kúni 17 saǵat 58 mınýtta QR ІІM TJK «Ońtústik óńirlik aeroutqyr jedel qutqarý jasaǵy» memlekettik mekemesiniń kezekshi dıspetcherine Qyzylorda oblysy TJD kezekshisinen Syrdarııa ózeniniń jaǵasynda, «Jaǵalaý» aýmaǵynda belgisiz áıel óz-ózine qol jumsaǵysy kelgeni jóninde habar kelip tústi. Bul týraly OTJD baspasóz qyzmeti habarlady.
Jasaq qutqarýshylary atalǵan meken-jaıǵa shuǵyl túrde shyqty. Jasaq qutqarýshylaryn kórgen áıel kisi sýǵa sekirip ketti. Qutqarýshylar men polıtsııa qyzmetkerleri birlesip, shuǵyl túrde jas áıeldiń ómirin qutqaryp, jedel-járdem qyzmetkerlerine tapsyrdy.
Sodan keıin jas áıeldiń tolyq málimetteri jáne turǵylyqty meken-jaıy anyqtaldy. Ol Qarmaqshy aýdany Josaly qystaǵynyń turǵyny bolyp shyqty. Óz-ózine qol jumsaýǵa árekettenýiniń sebebin polıtsııa qyzmetkerleri anyqtaýda.
