Syrdarııa ózenindegi sý deńgeıi tómendep barady

QYZYLORDA. QazAqparat - Syrdarııa ózeninen Qyzylorda oblysy aýmaǵyna sekýndyna 520 tekshe metr sý aǵyp keledi, dep habarlaıdy QazAqparat.

Qazirgi tańda Shardara sý qoımasyna - 4,81 mlrd tekshe metr sý, Kóksaraı sý rettegish qoımasyna 139 mln tekshe metr sý jınaqtaldy. Al Qyzylorda sý torabynan Syrdarııanyń tómengi aǵysyna jiberilgen sý kólemi - 56 tekshe metr. Sý deńgeıiniń azaıýyna baılanysty aýyl sharýashylyǵy daqylary, onyń ishinde kúrishti 78 346 gektarǵa egý mejelengen.

«Shardaradan joǵary ornalasqan sý qoımalaryna jınaqtalǵan sý kólemi - 16,7 mlrd tekshe metr. Bul ótken jylmen salystyrǵanda 0,1 mlrd tekshe metrge artyq. Syrdarııa ózeni basseınidegi eń úlken sý qoımasy - Toqtaǵulda 10 mlrd.tekshe sý bar. Búginde Kóksaraı sý rettegishine jınaqtalǵan sýdyń kólemi 140 mln tekshe metrdi qurady», - dedi Aral-Syrdarııa basseındik ınspektsııasynyń bólim basshysy Seıithan Abýov.

Sońǵy jyldary Syrdarııa ózenindegi sýdyń tapshylyǵy kólderdiń qurǵaýyna, aýyl sharýashylyǵy daqyldarynyń azaıýyna ákelýde. Sý tapshylyǵyna baılanysty 20 joba iske asyrylmaq.

«Bıyl jalpy uzyndyǵy 1 034 shaqyrymdy quraıtyn 162 kanaldy tazalaý jumystary júrgizilýde. Jańaqorǵan aýdanynda Syrdarııa ózenindegi úrmeli sý tospasynyń isten shyǵýyna baılanysty Kelintóbe magıstraldy kanaly sýlandyrylmaq. Sondaı-aq, Kelintóbe magıstraldy kanalynyń 9,2 shaqyrymy tazalanyp, qosymsha sekýndyna 14-15 tekshe metr sý berý kózdelgen», - dedi oblystyq tabıǵı resýrstar jáne tabıǵat paıdalanýdy retteý basqarmasynyń bólim basshysy Juldyzaı Aıtjanova.

«Oblys boıynsha barlyq kanaldardan sekýndyna 424 tekshe metr sý alynýda. Degenmen, Syrdarııa ózeninde kúrdeli sý tapshylyǵy bolýy múmkin. Ásirese bul jaǵdaı Jalaǵash, Qarmaqshy, Qazaly aýdandarynda qatty seziledi. Oblystyq aýyl sharýashylyǵy basqarmasynyń málimetine sáıkes, 55 927 gektarǵa kúrish daqyly egiledi. Qala jáne aýdandar boıynsha kúrish daqylyn egý jumystaryn 1 maýsymǵa deıin aıaqtaý týraly hat joldandy. Qarapaıym sharýa ıeleri de sý tapshylyǵyn eskerip, egis kólemin azaıtýy kerek. Olaı etpegen jaǵdaıda qıyn jaǵdaıǵa ushyraýy múmkin», - dedi «Qazsýshar» RMK Qyzylorda oblystyq fılıaly dırektorynyń orynbasary Jorabek Ernazarov.