Syrdarııa ózenindegi kóshken seń Aral teńizine jaqyndady
QYZYLORDA. QazAqparat - Búgingi tańda Syrdarııa ózenindegi muz kóshkini tolyǵymen Qazaly aýdany mańynan ótip, Aral teńizine jaqyndady, eshqandaı qaýip joq, dep habarlaıdy QazAqparat.
Bul týraly oblystyq jumyldyrý daıyndyǵy basqarmasy basshysy Serik Sermaǵambetov málim etti.
Basqarma basshysynyń aıtýynsha, búginde darııa jaǵalaýy men eldi mekenderdi sý alý jóninde eshqandaı qaýip týyndap otyrǵan joq. Darııanyń tómengi bóligindegi barlyq qorǵanys bógetteri nyǵaıtylǵan. Mamandar tarapynan táýlik boıyna ózen arnasy turaqty baqylanyp otyr.
«Bizdiń boljam boıynsha búgin, 31 naýryzda keshke qaraı muz Aral teńizine jetedi. Seń keptelisi joq. Ótken jyldary qaýipti jerlerdiń bógetteri bekitilgen bolatyn. Al, muz qalyńdyǵy 30-40 santımetr bolǵan jerlerde ony jarý sharalary júrgizildi», - dedi S. Sermaǵambetov.
Esterińizge sala ketsek, 28 naýryzda Qazaly aýdanyndaǵy Á.Tynybaev atyndaǵy Qazaly sý torabynyń deńgeıi kóterilip, darııa boıyndaǵy qorǵanys bógetterine qaýip tóndirdi. Al 29 naýryz kúni Qazaly aýdanynda muz saldarynan bógetti sý shaıdy. Saldarynan "Shaǵala" tynyǵý lageri mańyn sý aldy.
Basqarma basshysynyń aıtýynsha, lager janynda sý tartý jumystary júrgizilýde. «Onyń 2,9 gektar aýmaǵyn sý basty. Qazirgi kezde sý tartý jumystary júrýde. Jalpy, lagerdiń jóndeý jumystaryna qarjy bólingen, aldaǵy ýaqytta onda kúrdeli jóndeý ótkiziledi», - dedi S.Sermaǵambetov.
Ádilet Qańtarbaev
Foto: meteovesti.ru
