Syrdarııa ózeni boıyndaǵy qorǵanys bógetterine qaýip tóndi
QYZYLORDA. QazAqparat - Qyzylorda oblysynda Qazaly sý torabynyń deńgeıi kóterilip, darııa boıyndaǵy qorǵanys bógetterine qaýip tóndi, dep habarlaıdy QazAqparat tilshisi aýdan ákimdigine silteme jasap.
Búgin Á.Tynybaev atyndaǵy Qazaly sý torabynyń deńgeıi kóterilip, darııa boıyndaǵy qorǵanys bógetterine qaýip tóndirdi. Sondyqtan osy aýmaqqa jaqyn ornalasqan Mortyq, Balyqshylar ýchaskeleriniń turǵyndaryna eskertý jasalyp, tórt túlik mal ýaqytsha qaýipsiz aımaqqa kóshirilgen.
«Oryn alǵan jaǵdaıǵa baılanysty, oblys ákiminiń orynbasary Serik Súleımenov bastaǵan tıisti mekeme basshylary tikushaqpen oqıǵa ornyna jetti»,- dedi ákimniń baspasóz qyzmetinen.
Qazirgi tańda aýdannyń azamattyq qorǵaý qyzmetteriniń kúshimen darııa boıynda qaýipsizdik sharalary kúsheıtilip jatyr.
Ádilet QAŃTARBAEV
