Syrdarııa ózeni arnasyndaǵy jaǵdaı qatań baqylaýǵa alyndy
QYZYLORDA. QazAqparat - Qyzylorda oblysynda Syrdarııa ózeni arnasyndaǵy jaǵdaı qatań baqylaýǵa alyndy, dep habarlaıdy QazAqparat tilshisi.
«Oblys aýmaǵyna joǵarydan kelip túsip jatqan sý kólemi sekýndyna 640 tekshe metrdi quraýda. Qyzylorda sý torabyna deıin sý taratýshy kanaldarmen barlyǵy 110 (onyń ishinde kanaldarmen 76, sý shyǵyny jáne arnalarǵa jaıylý 34) tekshe metr sý alynsa, toraptan tómenge sekýndyna 530 tekshe metr sý ótýde. Aral, Qazaly, Qarmaqshy, Jalaǵash, Syrdarııa aýdandarynda muz tolyqtaı ustassa, Shıeli, Jańaqorǵan aýdandarynda ózen beti taza», - deıdi oblystyq jumyldyrý daıyndyǵy basqarmasynyń basshysy Serik Sermaǵanbetov.
Qala ákiminiń orynbasary Asylbek Shámenovtiń aıtýynsha, oblysta sý tasqynyna qarsy jumystarǵa paıdalanylatyn materıaldyq-tehnıkalyq qorlar, qajetti materıaldar jasaqtalǵan. «Kazavıaspas» AQ-men kelisimshart arqyly eki tikushaq daıyn. Muz jarý jumystaryn júrgizýge arnaıy mamandandyrylǵan mekememen aldyn ala kelisim jasalynǵan.
«Sondaı-aq, aıta ketý kerek, saıajaılar men eldimekender tusynda jerasty sýy kóterilip jatyr. Bul tabıǵı protsess. Qalypty jaǵdaı. Jylda qaıtalanady», - dedi «Qazsýshar» óndiristik ýchaskesiniń basshysy Jorabek Nurymbetov.
Jalpy, sý tasqyny jaǵdaıynyń aldyn alý maqsatynda 2016-2017 jyldary Syrdarııa ózeniniń qorǵanys bógetiniń 96 qaýipti ýchaskesi anyqtalyp, búginde ol jerlerde tolyqtaı nyǵaıtý jumystar júrgizildi.
