Syrdarııa deńgeıi birshama tómendedi
QYZYLORDA. QazAqparat - Jyl basynan beri Qyzylorda qalasy, Syrdarııa jáne Jalaǵash aýdandary tusyndaǵy Syrdarııa ózeniniń deńgeıi aıtarlyqtaı tómendedi.
Bul týraly Óńirlik kommýnıkatsııalar qyzmetinde ótken brıfıngte QR Qorshaǵan orta jáne sý resýrstaryn paıdalanýdy retteý jáne qorǵaý jónindegi Aral-Syrdarııa basseındik ınspektsııasy basshysynyń orynbasary Jumahan Nurseıitov aıtty, dep habarlady QazAqparat HAA tilshisi.
«Ózderińizge belgili, ótken jyly Jalaǵash jáne Qarmaqshy aýdandarynyń tusynda sýǵa qatysty birshama qıynshylyqtar týyndaǵan bolatyn. Atalǵan máselelerge qatysty oryn alýy múmkin jaǵdaılardy seıiltý - sý qoımalaryndaǵy rezervter esebinen júrgizilýde. Kezinde tómenge qaraı 1 myń tekshe metr sý jiberilgen bolsa, qazirgi tańda jiberilip jatqan sý kólemi 700 tekshe metrge deıin tómendedi. Atalǵan 700 tekshe metr sýdyń 400 tekshe metri Kóksaraı sý qoımasyna quıylýda. Osynyń áserinen Syrdarııa ózenindegi sý deńgeıi taǵy da tómendeıtin bolady. Qyzylorda oblysynyń tóńiregine túsip jatqan sý kólemin sekýndyna 300 tekshe metrge deıin azaıtýǵa qol jetkizý - qaýipsiz jaǵdaı týǵyzýǵa oń yqpal etedi», - dedi ınspektsııa basshysynyń orynbasary.
Aıta keteıik, qańtar aıynyń basynan beri Qyzylorda qalasy tusyndaǵy sýdyń deńgeıi 1 metrge deıin, Syrdarııa jáne Jalaǵash aýdandary terrıtorııasyndaǵy sý kóleminiń deńgeıi 70-80 sm deıin tómendegen.
