Syrdarııa aýdanynda tótenshe jaǵdaı jarııalandy
ASTANA. QazAqparat - Qyzylorda oblysynda aýyl sharýashylyǵy maqsatyndaǵy jerler sý astynda qaldy. Tıisti atqarylǵan sharalarǵa qaramastan Syrdarııa Qaljan aýyly aımaǵynda dambany buzyp ketken, dep habarlaıdy Astana TV.
Dambanyń Qaljan aýylynan 5,5 km aımaqtaǵy bóliginen sý ketip, 2,5 myńnan astam aýyl sharýashylyǵyndaǵy jerlerdi ózen sýy basty. Bul jerlerdiń 500 gektary kúrish alqaptary, ózgeleri jaıylmaly jerler men egistik alqap. Aımaqta tótenshe jaǵdaı jarııalandy. Dambany sý 29 qańtarda-aq jaryp ketken. Sodan beri buzylǵan jerdi eki merdiger uıym qalpyna keltirýge tyrysýda. Bul degenińiz 60 adam men 16 arnaıy tehnıka. Soǵan qaramastan 1300 metr aýmaqtaǵy jerdi bekitý múmkin bolmaı tur.
«Syrdarııa aýdany boıynsha tótenshe jaǵdaı jarııalandy. Oblys ákimi tótenshe jaǵdaılar komıssııasynyń otyrysyn ótkizdi. Syrdarııa ózeniniń oblys aımaǵyn alyp jatqan bóligi 1274 km-di quraıdy. Osy alqaptyń 1111 bóliginde qalyńdyǵy 20-dan 60 sm-ge deıingi muz qatqan. Onyń astynda 2-2,5 metr tereńdikte shuńqyr qalyptasyp, sý aǵa almaı, tasyp jatyr»,-dep túsindirdi Qyzylorda oblysy mobılızatsııalyq daıyndyq jónindegi basqarma jetekshisi Ǵabıt Janbaev.
Damba 2-3 kún kóleminde jóndelýi tıis, al sýdan aımaq kóktemde tazartylady.
Qazir óńirde aýa temperatýrasy túnde -17 gradýsqa deıin jetedi.
