Syrdarııa aýdanynda 42 otbasy baspanaly boldy
ASTANA. QazAqparat - Qyzylorda oblysy Syrdarııa aýdanynda 42 otbasy baspanaly boldy, dep habarlaıdy óńirlik ákimdiktiń baspasóz qyzmeti.
Turǵyn úıler «Nurly jer» baǵdarlamasy aıasynda salyndy.
Jańa páterdiń kilti 42 januıaǵa - olardyń qatarynda bıýdjettik sala qyzmetkerlerine, baspanasy apatty jaǵdaıda dep tanylǵan otbasylarǵa, jetim jáne ata-anasynyń qamqorlyǵynsyz qalǵan balalarǵa, halyqtyń áleýmettik osal toptaryna jáne Uly Otan soǵysynyń ardageri ıAhııa Tasyrovqa tabystaldy.
Oblys ákimi Qyrymbek Kósherbaev aýdan ortalyǵy Tereńózek kentindegi kópqabatty eki úıdiń ashylý saltanatyna qatysty.
«Memleket basshysy N.Á.Nazarbaevtyń bastamasymen qabyldanǵan «Nurly jer» baǵdarlamasy boıynsha búgin Syrdarııa aýdanynda kópqabatty turǵyn úıdiń qurylysy aıaqtalyp, 42 otbasyǵa jańa páterdiń kilti berildi. Bul - turǵyn úı kezeginde turyp, búgin páterli bolý baqytyna ıe bolǵan árbir otbasy úshin zor qýanysh», - dedi aımaq basshysy.
Turǵynúıdiń ashylý saltanatynda páter alýshy turǵyndar baspana máselesin sheship bergeni úshin aımaq basshysyna alǵystaryn bildirdi.
"2009 jyldan bastap turǵynúıge kezekte turmyn. Kóp jyl boıy úsh balammen jaldamaly páterden-páterge kóship júrdik, búgin kópten kútken jalǵa beriletin turǵynúıge qol jetkizdik, endi tek kommýnaldyq qyzmet aqysyn tóleıtin bolamyz. Keń úsh bólmeli páterge ıe bolǵanymyzǵa óte qýanyshtymyz, oblys basshylyǵyna alǵys aıtamyn", - dedi Álııa Ábdihalyqova.
"Men búgin jańa páter alǵanyma qýanyshtymyn, búkil januıanyń atynan alǵysymdy bildiremin. Buǵan deıin biz apatty úıde turǵan edik, sondyqtan bizdiń qýanyshymyzdy sózben aıtyp jetkizý qıyn", - dedi Gúlsara Bershimbaeva.
Aıta keteıik, búginde Qyzylorda oblysynyń aýmaǵynda 1747 páterlik taǵy 69 kóppáterli turǵynúıdiń qurylysy júrgizilýde. 55-i bıyl iske qosylady, olardyń qatarynda Syrdarııanyń sol jaǵalaýyndaǵy 14 kóppáterli turǵynúıden quralatyn tutas shaǵyn móltek aýdandy paıdalanýǵa berý josparlanyp otyr. Óńirde 2013-2018 jyldary 2,6 mln.m2 turǵynúı paıdalanýǵa berildi, al sońǵy 2 jylda memlekettik qarajat jáne jeke merdigerlerdiń esebinen 500 myń sharshy metr turǵynúı salynǵan.
