Syrdaǵy balyq ónimderiniń eksporty bes esege artty
QYZYLORDA. QazAqparat - Byltyrǵy jyly oblys boıynsha balyq aýlaý lımıti 7883 tonna bolyp belgilense, sonyń 90% tonnasy Kishi Aral teńiziniń úlesinde.
Osynyń nátıjesinde ótken jyly 7200 tonna balyq aýlanyp, balyq ónimderiniń eksporty sońǵy tórt jylda 5 esege artty.
Bul týraly búgin Óńirlik kommýnıkatsııalar qyzmetinde sala basshylarynyń qatysýymen ótken brıfıngte oblystyq tabıǵı resýrstar jáne tabıǵat paıdalanýdy retteý basqarmasynyń basshysy Erkebulan Bekjanov málim etti, dep habarlady QazAqparat HAA tilshisi.
«2016 jyly oblys kásipkerleri reseılik áriptesterimen birlesip, RF Ýlıanovsk oblysynyń Dmıtrovgrad qalasynda balyq óńdeý zaýytyn ashyp, aral balyǵyn óńdeýde. Sonymen qatar, aımaǵymyzda jyldyq qýattylyǵy 11 myń tonna bolatyn 8 balyq óńdeý zaýyty jumys jasaýda. Osynyń nátıjesinde sońǵy tórt jylda balyq ónimderiniń eksporty 5 esege artty. Atap aıtqanda,
2015 jyly 1735 tonna balyq ónimderi eksporttalsa, ótken jyly bul kórsetkish 3604 tonnaǵa jetti» - dedi basqarma basshysy.
Aıta keterligi, Elbasynyń bastamasymen qolǵa alynǵan «Syrdarııa ózeniniń arnasyn retteý jáne Aral teńiziniń soltústik bóligin saqtaý» jobasynyń birinshi bóliginiń júzege asyrylýy nátıjesinde Aral óńiriniń balyq sharýashylyǵy damýyna úlken múmkindikter jasalǵan. Osynyń arqasynda búgingi kúni balyqtyń 23 túri qaıta kelip, balyq aýlaý kólemi 400 tonnadan 8000 tonnaǵa deıin ulǵaıdy.
