Syrbaıdyń búkil óleńi ánge suranyp tur - Q. Ábil
ASTANA. 21 qyrkúıek. QazAqparat - Reseıde Uly Otan soǵysy týraly án kóp deımiz. Bizde Ramazan Elýbaevtyń «Jas qazaǵy» men Syrbaı Máýlenovtyń «Soǵystan qaıtqan soldattarynan» basqa án joq deýge de bolady. Al shyn mánisinde Syrbaıdyń búkil óleńi ánge suranyp tur.
Shirkin, solarǵa qazirgi kompozıtorlar án jazsa, bizde de soǵys týraly ánderdiń úlken blogy paıda bolar edi.
Bul týraly búgin QR Ulttyq akademııalyq kitaphanasynda «5 taǵdyr - 5 kesh» jobasy aıasynda kórnekti aqyn, Memlekettik syılyqtyń laýreaty Syrbaı Máýlenovtyń 90 jyldyǵyna arnalǵan «Jyr - Báıterek» atty ádebı keshte QR halyq aqyny Qonysbaı Ábil aıtty.
Ádebı keshke aqynnyń uly, zań ǵylymdarynyń doktory, professor Ǵazız Máýlenov, aqyn-jazýshylar Nurǵoja Oraz, Tólen Ábdik, Serik Turǵynbekuly jáne taǵy basqa qoǵam qaıratkerleri, sondaı-aq Astanadaǵy S. Máýlenov atyndaǵy mektep pen basqa da bilim oshaqtarynyń oqýshylary boldy.
Sharaǵa oraı kitaphana qyzmetkerleri «Syrshyl jyrdyń sańlaǵy» atty kitap-ıllıýstratsııalyq kórme ázirlepti. Onda S. Máýlenovtyń ómiri men shyǵarmashylyǵy san alýan qyrynan ashylady.
